| Ogni omo (o dona) che nassi su la Tera el gà una lingua o favela che se ciama lingua madre o Madrelingua, perché la xe la lingua, el idioma che la sua mama, essa la ghe parlava quando che el era picio.
Mi go la madrelingua italiana perché la mia mama, essa la me ga sempre parlado in italian, ossia in fiumàn, de quando che go averto i oci e respirado la prima bocada de aria de Fiume, aria che nel milenovecento e venti oto la era , mi credo, più neta e meno inquinada de ogi.
De noi a Fiume, emporio e punto de incontro tra el Oriente e el Ocidente, se parlava diverse lingue. La mia mama bonanima, presempio, essa la saveva parlàr franco per todesco (austriaco) croato ( dialeto de Fiume-Susak) e qualcossa de ungarese. E era, se volemo, una bela roba, che sta gente la parlava tute 'ste lingue. La mentalità la era più vasta e se se capiva con tuti : coi ciosoti (gente da Chioggia) che i vegniva coi bragozzi (barconi) a vender angurie, coi gendarmi ungaresi, cole mlecarizze (venditrici di latte a domicilio) che ogni matìna le ne portava a casa late fresco, skrupic' (panna) e puìna (ricotta).
I dotòri presempio - che molti de lori i gaveva studiado a Viena - in Sala de Operaziòn (Ospedale Civile di SS. Spirito) tra de lori i se parlava spesso e volentieri per todesco. E era - ripeto - assai bèl che noi gavevimo sto caratere cosmopolita.
Mi, dopo el Esodo, gò girado, un poco come tuti noi: prima campo profughi e dopo - per un pochi de ani - in giro per el mondo, per paesi e lingue diverse.
Mi credo, sinceramente, che tuto sto ghèto (chiasso confusionato, incomprensione) tra i omini e i popoli, 'sti dispeti, guerigliamenti e mazamenti che i se fa, xe tuto colpa de la Tore de Babele.
Penseve , se el Presidente Giorgio Bush (padre) quela volta , el gavarìa (avesse) savudo parlar per arabo sc'èto col Sadat Husein che el comandava (e el comanda ancora ogi) el Governo de Baghdad, el gavarìa (avrebbe) podudo ciacolàr cola paciada (con calma) col Rais (come che i lo ciama) in arabo, e el ghe gavarìa (avrebbe) deto : "E'smah (che vol dìr in arabo "ciò ti") ma cossa che fazemo con 'sto Kuwait ?... sentèmose insieme (magari pertera come i arabi) e bevemo una scudelèta de moka...", mi credo che no'i gavaria (avrebbero) fato copàr (ancora ogi non se sa quanti) una sàja (gran numero - pron. xaja - La lettera "x", nella lingua del Goldoni, si pronuncia sempre come la "s" italiana nelle parole "asola", "asino" etc.) de disgraziadi pòvari arabi morti de fame e tantissimi (anche qua noi ga mai voludo dir quanti) giovani mericani nel deserto (anche tanti fii e nipoti de zente nostra, italiani emigradi nei Stati Uniti) che a mi me xe vegnudo subito inamente i nostri pòvari alpini de la Julia, in montura de tela kaki, non nel Deserto (xe morti bastanza dei nostri inte la sàbbia tra Tobruk e Giarabub), ma jazadi (congelati) de inverno in Russia. Mi me ricordo che, durante le "Sanzioni", nei anni Trenta, noi muli (ragazzi) erimo andadi in clapa (gruppo chiassoso) organizadi dal Partito (fascista) a far remitùr (confusione chiassosa) ("dimostraziòn" se diseva già quela volta) soto el Consolato Inglese a Fiume, in Riva, che el era nel palazzo indove che era el cinema "Sala Roma". Erimo andadi a protestàr contro la " Home Fleet" (la flotta britannica) che la ne blocava i comestìbili e el carbòn. Per farghe smàco apunto a la Home Fleet, gavevimo manighi de scòva con suso impicadi (appesi) baràtoli del "FLIT" cola pompèta col manigo de legno: tanto per capirse, quei de la "Guera ale Mosche" (dichiarata da Benito Mussolini) che, se ve ricordè, in ultimo la gaveva vinta le mosche.
Bon, quela volta mi ero fermamente convinto che tuti 'sti inglesi, come che i ne contava a scòla, i era tuti una maniga de manigoldi,
ludri, zòbani (zotici) e derelitti.
Tanti anni dopo - tanti - mi go anche vissudo con una famiglia inglese patòca (originale - indigena) a Chipperfield, nel Hartfordshire, in campagna, vizìn de Londra. Parlando la lingua e capìndome ben con 'sta gente, go visto che anche 'sti britanici i era gente come noi, assai a la bona, un poco strazòni, sì, (cola giachèta de tweed coi tacamachi (pezze incollate) de
coràme sui còmi (gomiti) - che adesso xe assai moderno e chic) - se capivimo, disevo, benissimo e mi me son trovado assai ben e gavemo fato quela volta in bètola (Pub) tante bele cantade e bevude insieme.
A tuti i omini ghe piasi ciacolàr. Che i parli per taliàn, inglese, croato, todesco, spagnòl o swahili. E davanti de un otavo de vin o una birrèta, mi go fato in tuto el mondo tantissime e simpatiche ciacolade per inglese, franzese o
todesco.
Credeme a mi, muli, xe tuto colpa de la Tore de Babele.
I nostri fioi e nipoti co' i va a scola coi muli australiani a Melbourne, coi canadesi a Toronto, coi pelirosse a Chicago o coi greghi (greci), spagnoi e turchi a Francoforte, noi ga nissùn , ma nissùn , problema.
I se gioga in tìtilaga (chiapparello, l'hai tu, tocco) o in zop-zop (campana) ogni tanto i se mola una papìna (schiaffa educativa, data per insegnare la buona creanza, non per offendere) o i se dà, cole mulete (ragazzine) un baseto in scuro.
Domani, quando che noi sburteremo radìcio (spingeremo il radicchio) (de soto) (da sottoterra) lori i sarà citadini de 'sti paesi e i dirà sempre: la mia Mama, el mio Papà, la mia Nona, i me contava che noi semo de una Zità che la se ciamava FIUME, una zità che la era assai bela e elegante, con un grando Golfo de mar tuto blu indove che era boschèti de làvrano e bone zarièse e àmoli (ciliege e albicocche).
Mi credo che la Tore de Babele la xe una invenziòn de un qualche malignaso per seminàr zizzania e incompresiòn fra i omini.
Noi fiumani , noi non volemo far guèra a nissun.
In Italia, Australia, Canada, a Neviork a Zurigo noi rispetemo tuti, ciacolemo con tuti e volemo che tuti i ne rispeti : non semo zìngani o gente senza una Naziòn, ma semo fioj de una Tera de lingua e cultura italiana che la era el ultimo Avanposto de la " Abendland" come che disi i todeschi, cioè de la Cultura de el Occidente, rispetto al "Morgenland" che xe el Est de la Europa e tuto el Oriente, Medio o Lontàn.
Scolteme a mi, muli, ciacolè e non steve far cativo sangue.
'Sti anni che ancora ne resta sul Pianeta Terra ciacolemò liberamente e serenamente e zerchèmo de contarghe tuto ai nostri fioj e nipoti perché i sàpi che la origine, la "matrice" de tuti noi la se ciama e la se ciamarà sempre FIUME.
Giulio Scala __________ Una disavventura al telefono La Tore de Babele Ricordi canadesi e quarnerini Ricordi de un balilla BASE HOME
|
