Se usava come jesca la schila e i branzini i magnava sopratuto quando che era cosserich de luna. In testa del Molo Scovazza de sera, quando che se impizava i ferai - se butava le ociade sul brumo de pan e la meja jesca era el vermo lombrico.

Cole nasse, grando pescador era el signor Arduino, che el viveva dela pesca. Lui ciapava seppe, salpe, spari, gronghi, arboni e astisi e altro pesse, ma drento del porto era fazile perder anca la nassa per colpa dele propele dei vapori che fazeva forti vortisi a fondo. Noi non gavemo ciapado mai orade e branzini con la nassa.

In Italia, gò savudo che el signor Arduino el era saltado per aria sopra una mina quando che - subito dopo che la guera era finida - el era andado a pescar in Bodolia con amici che i gaveva un motor. Purtropo el Quarnero era pien de mine e anca noi gavevimo incuzado una de queste.

I Drusi i bonificava el mar coi scarsi mezzi che i gaveva e i gà impiegado molto tempo per risanar el Quarnero perché prima i gà scominziado dragar la nostra parte indove che era el porto, anca se distruto, che ghe interessava.

Me ricordo che ogni giorno due peschereci i gratava el fondo davanti del nostro porto per trovar ste mine, I caminava in copia - paraleli un cinquanta metri un dal altro - e ognidun tegniva in pupa un unico grosso cavo de fero che el era lascado drio del pescherecio e el terminava sula pupa del altro. Quando che el cavo imbragava el ancoragio o el cavo dela mina, el cavo scoreva e frenava la andatura dei peschereci. Così el segnalava che un ostacolo, che era la mina, era inganzado.

Purtropo in Bodolia i era arivadi in ritardo.

La pesca più bela e reditizia era quela che se fazeva dala barca, ma bisognava vogar una bona mesa ora per passar el Molo Longo che nol finiva mai coi sui 1500 metri, partindo dala Riva dei Bodoli-Molo Stocco o dal Idroscalo, indove che stava ormegiada la magior parte dele barche de pesca.

I più importanti atrezzi de gaver in barca era le togne, la voliga, la jesca e la tavoleta indove tajar la jesca, la panola per i scombri, la britola, la sessola e la surga o scandaio, che era la corda che se ligava al peso che andava a fondo e che deveva tegnir ancorada la barca.

Noi tegnivimo tuto in barca, anca i remi e la vela e non ne xe mai mancado gnente. Forsi era i tempi del Regime e i ladruncoli i gaveva paura de ris’ciar.

El nostro mar el gaveva una fondezza de 60-70 metri e el strano xe che i pescadori fiumani per dir 60 metri i dixeva 40 passi e i calcolava i passi cola lungheza dei propri brazi aperti. Una vera contradizion.

Le togne le era fate de fil de seta e con lore se pescava al volo o 8-10 metri soto dela barca. Per pescar a fondo ghe se voleva la canavaza, che era una roba molto laboriosa de far che però se podeva comprar anca nel Apaltin in riva. Un pescador de Citavecia inveze se la fazeva da se stesso perché al contrario de ogi el tempo non mancava. Bisognava gaver coda de caval, 9 fili, intojarli a 3 a 3 e ligarli poi insieme per far un tochetin de apena 40 centimetri. E tuti sti tochi de apena 40 centimetri i vegniva poi ligadi uno col altro per far la togna de 70-80 metri, che se la involtizava su un bel grando sugaro.

La togna terminava col giogolin indove era ligado el terminal, cioè le prame coi 4 ami, el piombo che tiri zo la canavaza e soto del piombo la prama col amo per pesse grosso. Ma per pesse grosso, la togna era fata de treina e el terminal de fil de aciaio.

I ancoroti de una volta non i andava ben per surgarse perchè i gaveria avudo bisogno de almeno 150 metri de zima. E non basta, perché ghe se gaveria voludo anca una àncora molto pesante e chi la tirava poi sopra?

Per questo ognidun se rangiava come che’l saveva e noi usavimo el fero, che era un tubo de 5 zentimetri de diametro e 40 de lungheza, svodo ma impinido de zimento, che’l pesava sui 3 chili: lo mandavimo zò gavendo la furbizia de fermarlo prima che el arivi a fondo perché con 70 metri de corsa el se gaveria impirado sul fango, che poi saria stado molto difizile tirarlo fora.

Per questo ghe regolavimo el abrivo e qualche volta ne era lo stesso difizile liberarlo dal fondo indove che el se gaveva impirado.

Alora tiravimo a tuta forza la zima fino a sbandar el fianco dela barca; el padre ghe dava una volta-rionda dela zima sul schermo e rolando la barca col nostro peso sul fianco oposto, el fero se discuzava e podevimo tirarlo su.

Quando sucedeva che el fero no’l se liberava dal fango perché el se gaveva conficado tropo, cominciavimo sudar fredo perché era squasi el tramonto e bisognava tornar a casa. E quando che se liberavimo, che gioia!

Se no, non era altro che tajar la zima e perder el scandajo.

El nostro Quarnero era un mar molto calmo, un ojo, con poca corente e perciò molto adato per la pesca, ma lo stesso bisognava gaver sempre i occi ben averti in Bodolia de dove podeva nasser a tradimento la bora.

Co’ se vedeva i sparnaci che i se alzava de sovra la Boca Picola bisognava involtizar de corsa le togne, tirar su el scandajo e darghe coi remi.

Non gavevimo le previsioni del tempo come ogi e per questo la gente non la se fidava de andar molto al largo se non i era sgaj, ma quando che era bel tempo bastava surgarse fora a un 600-800 metri dala Lanterna per ciapar cola sardela moli, rase e qualche picolo pessecan de un trenta deca, che noi ciamavimo pesse gato, da non confonder con el guato che se ciapava sule rive e serviva come jesca per pesse grosso.

Chi che conosseva i segnai, andava sui asperi che era i nidi indove che se pascolava i pessi, e podeva esser grote opur brazere chersine o bodole, ciapade a tradimento dala bora mentre che le vegniva a Fiume carighe de roba de vender.

Là per prima cossa se ciapava le busbane - se dixeva che era le femine dei moli - e le busbane le magnava a fuga batuda non apena la togna la arivava a fondo. Ma poi se calava una togna per pesse grosso che se meteva sula campanela e quando che el pesse el magnava, podeva esser scarpena, arbon, grongo, asinel, sanpiero, asial.

Se era el grongo, guai tentar de ciaparlo con la voliga perché con la forza che el gaveva lui la sbregava in gnanca un minuto.

Per el grongo bisognava usar el "ganzo" che era un toco de manigo de scova con ligado un amo de pessecan, e con questo paricio bisognava inganzarlo sula gola soto dela testa quando che el afiorava e poi cola britola darghe sul zervel prima che el possi far dano ala barca per la incredibile forza che el gaveva.

El grongo infati gaveva la carateristica de non star cola testa in alto e con la coda in basso quando che se lo tirava. Apena incuzado, lui dava forti testade ma poi el cedeva e el se lassava tirar su stando orizontal. Essendo pesse grosso, el padre lo tirava pian e lui molava grandi baloni de aria che i scopiava in superficie.

La campanela normalmente era una steca dela ombrela che se la impirava su un buseto dela rasma dela barca con sopra la campanela ligada e un tapo de sugaro impirado sula steca. Sul tapo se fazeva una inferidura col cortel indove se fracava la togna. Quando che el pesse magnava, la steca, che la era elastica, la se piegava e così la fazeva sonar la campanela.

De domenica davanti del Porto Petrolio a un 500 metri dalla Lanterna - indove che a fondo ghe era ancora un sottomarin tedesco afondado - era almeno 40 barche ligade in andana de 4 o 5 barche ogniduna, che le pescava i scombri a un 6-8 metri de fondeza. Funzionava così. Scominziava le prime due a butar la àncora: una verso terra e l’altra verso fora, e poi le altre le se atacava surgandose ala stessa maniera.

La jesca era el buconaz, cioè la sardela tajada con una stricheta de calimar o dela panza de scombro per far bandiereta e inganar el pesse.

Ma la vera pesca dei scombri era quela fata cola panola indove che uno vogava e l’altro pescava. La panola era una sola togna che la pescava in quattro fondezze: una a volo de fil de seta che la se ciamava plitva, una a sei metri fatta de crena de caval involtizzada con picci piombi in maniera che la se afondi; vegniva poi una treina de un venti passi, che se ciamava telo, e quando che finiva el telo ghe era di novo una plitva e una coi piombi che pescava più l ontan.

In questo modo ogni barca la gaveva la plitva che la pescava a 8 metri al volo e i piombi più afondadi, poi in distanza de zirca 20 metri di novo - ma ancora de più afondade - la plitva e la altra togna coi piombi.

Drio del Mololongo, propio sul confin indove che finisse le grote e scominzia el fango, se ciapava bei cainzi, che i era speciai per far el brodeto cola polenta.

Quando che xe scopiada la guera, la paura dele mine la gà frenado la pesca fora del porto, ma lo stesso se podeva pescar ala imbocadura del porto, indove che - per paura dei somergibili - era stade messe le "baricate", che era reti de aciaio anti-somergibili. I pedoci che xe nati su quele rede, i xe stadi magnar e jesca fantastica per dentai, orade, arboni e branzini, ma nel stesso tempo quei pedoci i serviva anca per cavarse la fame. Poi nel 1941, quando che Sussak xe diventada italiana, se podeva passar - stando atenti a quando che se sbassava la marea - cola barca soto del Ponte de fero de Lazarus, che congiungeva la Riva dei Bodoli con el Mololongo, per andar in Porto Baross e evita più de una ora de voga atorno ala Diga. Qualche barca con la fiancada più alta, la se carigava de mar per afondarse de quel tanto che bastava per passar, che poi la scarigava cola sessola apena passada dala altra parte. Ghe convegniva bagnarse i piedi.

Noi andavimo a Martins’ciza indove che adesso xe i Cantieri Viktor Lenaz mentre quela volta era una splendida insenadura cola spiagia de sasseti e la nave "Split" brusada, che ghe restava solo la prova. La’ mi ghe portavo fora le togne al padre per le oradele e nel fratempo fazevo el bagno.

Un giorno un pescador de Sussak, mentre che sortivimo per Porto Baross, el ne gà domandà sforzandose in talijan "Me potete dire dove xe el sotosomergibile?". Sembrava una barzeleta del Cecchellin.

Quando che xe finida la guera, le barche fiumane le andava in molte a pescar fora del Porto Baross. Un giorno che el padre era a pesca col fradel Berto, propio in quela zona, i gaveva visto una barca che dava scossi drio man e sti quà i dixeva che ghe magnava "moli coi oci grandi". Mio padre el gaveva capido che i intendeva dir che i ciapava busbane, pesse de aspero, e per questo i era tornadi sul posto el giorno dopo e così i gaveva scoperto un novo aspero che i gà ciamado "Maona" perché ogni tanto i incuzava a fondo tochi de carbon coperti de bela vegetazion. I altri asperi se ciamava Mizpak, Grego, Sassi, Alborada, Sotomarin. Sula "Maona" el Mario gaveva incuzado el asinel e nel stesso momento ghe se gà butado de rapina una ansoleta de 5 chili che la gà ingutido el asinel. Gà dovudo ciapar la togna el padre se no la ansoleta la tirava zo al Mario.