Argomento sempre e dovunque de atualitá: la cusina. 
Cioè la magnadora: non la magnadora in senso - come dir - figurativo, quela dei politichi e dele bustarele - mani - pulite, coruzion, bori soto banco. No, quela alimentare.

Pensavo, propio el altro giorno, che quel che veramente ne unissi insieme - noi mitteleuropei - e in questa denominazion (qua la politica nazional e internazional no la ghe entra per gnente) mi meterio drento istriani, fiumani, dalmati, triestini e abitanti nativi de la Carinzia, Tirolo, Vienna, Boemia -la mia molje - Croazia, Slovenia, Baviera e i ungaresi.

Disevo, che quel che in un zerto modo ne unisi a noi mitteleuropei de la Defonta, de razze, costumi e lingue, xe i dolzi. Torte, paste, pasticcini, fritelle ezetera, asagiando le specialitá de tanti de sti paesi, me vien sempre in amente la nostra Fiume.

A Budapest, presempio, se magna ogi bonissime torte Dobosz, co la crosta dura de zucaro caramelado e dopo paste col "mon", che lori i lo ciama anche "mak", che saria i semi del papavero.

A Viena se magna cugluf  "Kugelcupf" - quel col buso in meso - per i non - adeti - ai - lavori - in tute le sue variazioni: con la salsa calda de vanilja o come che se usava da noi spolverando col zucaro vaniljato.

Non stemo parlar dei crafen che se trova un poco dapertuto, con drento marmelata, crema, ezetera, e anca se i nomi i xe diversi - a Monaco de Baviera e a Vienna i li ciama "krapfen, a Francoforte sul Meno "kreppel" e più a nord i li dise "berliner".

A Napoli go visto fora de una pasticceria la famosa Kaflish - impicada una tabeleta con scrito suso "Cráfeni". A Lubiana i fa ancora ogi Paste Creme alte cinque centimetri, come quele che compravimo da Sari in Zitavecia. In Tirolo, a Innsbruck, e in Sud Tirolo, a Sterzing-Vipiteno, se magna el più bon strucolo de pomi (Apfelstrudel) del Mondo.

Altra specialitá fiumana-ungarese, e qua - non esendo mi perito culinario - me sfuge le origini de la vivanda, xe quei che la mia mama bonanima essa la li ciamava "pomi in camiseta" (traduzione esatta dal tedesco "Apfel in Schlafrock" e che saria le fetine de pomo crude, tociade intela pastela de farina bianca, late, ovi e zucaro, e dopo frite.

Dopo xe anche le classiche "landize", che in tedesco - forsi perchè le iera el magnar dei poveri o nobili decaduti - se ciama "Arme ritter" Cavalieri poveri, che le xe fetine de pan vecio, anche queste inzombade intela pastela e frite. Che bon !

Scuseme se salto de palo in frasca, ma ve ricordè come che da noi era la panada - me par che qualchedun la ciamava "cassiza" - fata apunto con pan vecio, aqua bojente, sal e pevere, foie de lavrano, e un poco ojo de oliva dalmato, de quel bon ?

Tornando ai dolci, non volerio dismentigar la oresgnazza (dal croato "oreg" che vuol dire "noci") che a Trieste i la ciama "putiza, i crostoli e le fritole de carneval, le Fave dei morti e naturalmente per Pasqua, le pinze e i sisseri, che a Trieste i li ciama "Titole" che - sempre per i non addetti ai lavori - xe quele drezze-treccie de pasta, piturade col gialo del ovo, con in zima uno o due ovi lessi e coloradi. De origine, sembra, gallico-celtica,  Squasi me dismentigavo la roba più importante, le nostre Palacinche. A Trieste i le ciama Omlet, mentre invece le omelette le xe tuta una altra roba.

Fate in mille modi, con la conserva de susini - che in Boemia la se ciama Powidi - o con drento puina e zisibe (in Slovenia e in Austria) o come che i le fa i ungaresi a Budapest, con drento carne masinada, sugo de ragù, paprika dolze e coverte da panna garba (Hortobagy Palacinken). Mi go ancora ogi, a casa, quel che mi penso xe squasi una raritá bibliografica. el famoso libro de cusina de la Maria Stelvio, indove intela edizion che go mi (III Edizione 1936), la prima edizion la era del 1927 - sicome che quela volta era veramente proibida ogni estero-filia, compreso el dialeto, insta edizion del 1936 i ga "tradoto" in italian zerte robe, riportando però traparentesi i nomi originali.

La oresgnazza

Panicelli = "Palatschinken"

Gonfietti = "Krapfen"

Torta al ponce = "Torta al punch". Poi ancora:

Panini guarniti = "Sandwiches"

Salsicce della Cragnola = "Cragno"

Tacchino = "Dindio"

Anguilla vedi "Bisatto"

Grattoni di Grasso di Maiale = "Frize"

Vino caldo = "brulé"

Non xe tuto de rider ? Mi digo sempre che una dele tante robe bone de noi in Italia, xe che noi non ciolemo gnente sul serio. Non gavevimo preso sul serio gnanca Benito Mussolini e inveze i tedeschi i fazeva tuto, ma propio tuto per fil

e per segno quel che ghe diseva de far Adolfo Hitler. Purtroppo.

Me permeto, sempre con molta modestia e umiltá, de sperar che sta picola ciacolada ghe servirá forsi a qualche fiuman, o a qualche fiumana, in una qualche parte del mondo, magari in un canton del Canada o de la Australia, per ricordarse dele bone robe che fazevimo a Fiume e forsi ghe fará vegnir voja de farghe provar ai fioi e nipoti una dele ricete che mi go scrito.

Se cussì fussi, me faria veramente assai, ma assai piazer.

1982.

2 ^ PUNTATA

Continuano le ciacolade dalla MittelEuropa.

Simiotamento  de  Est  e  de  Ovest

La vita comoda, senza dubio, la xe bela. E qua, noi fiumani semo tuti d' accordo. Mentre nela Germania Est, o Orientale, o come anca la se ciama "Republica Democratica (!) Tedesca" i fa de tuto per simiotar i Russi. A scominziar cola Vodka, a finir col fato che tuti i muli deve andar el sabato dopopranzo ale adunate pre-militari.

Veramente sta roba me fa vegnir in mente altri tempi e altri luoghi: "Casa Balilla" el diria subito el mio amico Stocchi.

Qua che vivo mi con la molje e i fioi,

ne la Germania de l' Ovest o Occidentale, che saria poi la "Repubblica Federale Tedesca", i simiota al zento per zento i americani.

Se devo esser sinzero, sto simiotamento ga anca i sui lati boni. Presempio i "Centri d' acquisto" ("Einkaufszentrum") che xe come che fussi una granda fabrica fori de zitá, con un piazal per parchegiar un zinquemila machine. De drento, fazè conto che xe come una galeria, tipo quela de Milano, con tre o quatro piani batudi de boteghe de ogni roba possibile imaginabile: magnative, becher, pek, orefice, fiorista, dentista, caligher, barbier, giogatoli e "chi più ne ha, più ne metta".

Uno va drento e ne vien fore senza bori in scarsela.

Questa - come che disevo in prinzipio - xe le vita comoda: uno se impinissi, comodamente o squasi senza inacorgerse, el bagagliaio dela machina de roba che ghe ocori, e de un fotio de roba che no ghe ocori, e i sghei xe fuc'.

 Da noi a Fiume, in Belveder, del qual la via Bonaroti era el confin meridionale, mi andavo sempre a comprar dal Panbianco, che el gaveva la botega magnativa proprio in via belveder, in zima ala riveta che la vegniva su da Bonaroti, a destra visavì del pek.

Sta riveta, quando che iera neve, la iera el nostro "centro de sport invernali" dove slitavimo cole cassette de savon. Su in alto jera un grando morer (o gelso), che de estate i meteva soto un grando lenziol: i scassava el albero e veniva zo carigo de more bianche, profumade, bele sugose, dolzi come el miel, e a noi muli i ne lassava partezipar a la "vendemmia".

 

Tornando al Panbianco, lá ogni familia gaveva un libreto, cole righe e i quadreti, dove el botegher se segnava la spesa, e al 27 (San Paganino), o se pagava tuto, o se dava un aconto.

 Mi me ricordo che generalmente andavo a comprar diezi deca de conserva de pomodoro, che el paron el cioleva con un mestolo de legno da una grande lata e el pesava sula balanza, su un toco de carta oleada che poi el involtizava. Diezi o venti deca de marmelata de armelini, de persighi o de zariese, pesada con el stesso sistema dela conserva.

In scartozo, inveze, el Panbianco el pesava el zucaro, farina bianca, fasoi, potenta, bisi sutti e gries.

Patate se comprava dal carboner, che el vendeva anca petrolio, spirito de brusar, e valdivina.

Tuta la mia cariera scolastica a Fiume se ga svolto in piaza Cambieri; asilo, elementari, Tecnico.

Quando che andavo ale elementari, mia mama de matina la me dava qundizi zentesimi (de rame) per la marenda.

Prima dele scalete, in via Firenze sul canton era el panificio Bassi. Con zinque zentesimi me compravo una kaiserizza (panino) e con dieci una ciocolada rossa "Domus" con le figurine dei footbalisti: Baloncieri, Meazza, ecc.

Zentro e emporio, per noi mularia scolastica de piaza Cambierii era, come tuti sa, el apaltin del Chioggia. Lui, un bel omo, alto, coi cavei brizoladi, ufizialmente el era "sordo d' orecchio". Quando presempio un ghe domandava "un penin numero due" lui el ciamava inveze a voce alta: "Maria, la 'Vedetta'". Disevo, sordo ufizialmente perchè mi go sempre gavudo la impresion che el Chioggia quando che el voleva sentir, el sentiva.

 

Ogi qua in Germania Ovest non xe più penini, non xe più boteghe de alimentari, ne' salumerie, xe solo "Supermarkt", col servizio col careto, dove nisun ocori che domandi gnente o che el parli, e tuti lavora e magna: taliani, spagnoi, portoghesi, greghi, jugoslavi e turchi, e zercando ben se trova anca qualche tedesco, che el xe un poco spaesado in meso a tute ste raze e lingue diverse.

Del resto, some diseva qualche ano fa un mio carissimo amico d' infanzia in un ormai suo famoso libro di poesie in fiuman ... anca a Fiume, ebrei, zifuti, cristiani, turchi, morlacchi e meneghei ... passava da le nostre parti e poi i se fermava perchè l' America del monopattino la era proprio lá ...

 

Betole e usanze de camarieri

Argomento de ogi: i locai publici. El termine "Locale pubblico" el xe molto vasto e el comprendi sia i zinema che ... l' ufficio anagrafe. Mi però volevo dir qualcossa sui locai pubblici indove che se se trova,  se leze el giornal, se beve qualcossa, se gioga magari a carte, insoma volevo far una ciacolada su le ostarie, tratorie, cafè, betole, bar, birerie, mescite, botiglierie, e chi più ne ha più ne metta. Quele istituzioni publiche dove che l' omo o la donna in paze i se bevi un ottavo e i fa la ciacolada.

Durante tuti sti ani, dopo del esodo da la nostra Fiume mi go girado un poco el mondo e poderio parlar e scriver per ore e ore dei locai che go visto. Quei de Melbourne, presempio, con le tavele bianche sui muri - che Dio me perdoni, me pareva de essere in condoto - e la segatura per tera, indove che i "pendolari", spetando dopo el lavor ale zinque de dopopranzo, el treno per andar a casa, squasi i se sofigava per scolarse in pie, al banco, in premura, un dodici bire.

Me faria assai piazer se i conzitadini dela canguria me poderia dir se lá da lori xe ancora adeso cussì.

 

O anca i "pub" londinesi, quei in tel East - End, nei paragi del East India Dock, indove la bira a spina con la maniza la se ciama "ale" e la xe de color e aspeto compagno del liquido che molava i cavai dei cuceri in Sabiza.

In zentro de Londra, inveze, dove ogni aventor fisso el gaveva la sua bocaleta de peltro impicada su un ciodo, lá i era distinti e se beveva bira de botilia.

Qua in tedescaria le betole le xe bele, nete e ordinade, come del resto tuto xe ordinado in sto paese. De sera el omo, dopo del lavor e prima de andar a casa a rabiarse con la moje e i fioi, el se sluca al banco, sentado su un sgabel, la sua bireta, magari acompagnada da un "klarer", che xe poi un bicerin de petess.

E fin qua tuto ben. El grave scominzia quando el va con l' auto in autostrada, che qua xe tuto autostrada che se va gratis et amoris e non costa gnente. Ogni tanto - vol o non vol - la un ghe vien de far un bisogno e de bever una aranciata o un cafè !

In Italia, oggi in autostrada -che se paga e assai bori - un el parchegia in tala area aposita controlando quatro volte se tuto xe ciuso perchè non se sa mai - e in zinque minuti el se ciol lo scontrin de cassa e el se bevi el suo cafè nero o macchiato al banco e chi se ga visto se ga visto.

Qua nel paese di teutonia tuto xe assai più bibioso. Innanzituto in tele "Raststätte", che saria i posti de ristoro, apositamente in autostrada, un "banco" non esisti. Un, se vol bever qualcossa - magari de estate co el riva sudado e morto de sede - el se devi pulito sentar, calmo e ordinado, in un tavolino, e spetar che el camarier o la camariera ghe vegni a fomandar cossa che el vol. Se el ga fortuna e se el ghe fa impresion simpatica a la persona che serve, dopo ventizinque minuti vien el mato o la baba a cior la ordinazion, sempre che sia un giorno da poco traffico.

Dopo altri trenta, quaranta minuti, finalmente i ghe porta la scudela de cafè - che voi ghe dirii "slonz" o "sbìcia", o una aranciata che le naranze le ga viste in cartolina. E fin qua tuto normal. El tragico ariva quando che un - volendo arivar a casa prima che vegni note - el voleria pagar.

Nonostante segnai manuali e vocali, prima de un tre quarti de ora, non xe mai speranza che arivi el mato o la mula per incassar. Indove che un de noi, a un zerto punto, con le scatole piene, el saria andado via senza pagar ... el tedesco no! Zito e tranquilo e - logico - ordinado, el speta che el camarier, in un momento de bona luna, ghe vegni voia de incassar la consumazion.

Queste xe le grande doti del popolo germanico ! Se per combinazion ve capita de vegnir de ste parti co l' auto, scolteme a mi, porteve drio un termos e sandwiches, se volè arivar in giornada e senza pernotamenti per strada.

Su le ostarie de Fiume saria de scriver un romanzo, o meio una enciclopedia.

Mi ero ancora mulo e non go potudo far granda esperienza. Ma saria assai ben che un de voi, un giorno, col ga voia, el poderia scriver la storia dele ostarie fiumane. Tuto quel che mi me ricordo xe de sera - tornando a casa con la mia mama dal zinema Fenice - le bele cantade e i zighi dei giogadori de mora che se sentiva pasando davanti le ostarie.

Indove che in tute jera impicado el cartel: "E' severamente vietato il canto ed il gioco della morra".

E un altro: "Qua non si bestemmia e non si sputa per terra" !

E le bele ostarie col giogo de boce de estate ? Bon, adesso vado a slucarme la bireta, sentado sul scagno, al moto: "Val più un bicer de dalmato, che l' amor mio".

I  cinema  de  Fiume.

Un mio vecio amico fiuman el ga scrito l' altro giorno che in te le mie "ciacolade" mi son solo bon de parlar de magnar e bever e basta.

A mi, sinzeramente, me ga fato fota e me son sentido  ofeso nele mie ambizioni leterarie. Per salvar alora el mio nome de scritor "de vaglia" (come se diseva ai mii tempi) zercarò de scriver robe più educative.

Come tuti savè, el zinematografo xe "la decima musa").

 

A mi me piase sempre andar a veder una bela pelicola. Vojo dir bela nel senso artistico: regìa, fotografia, e bravi atori. Nela vita xe tuto relativo. Mia Mama bonanima, presempio, se in zinema non jera de pianzer non ghe piaseva. Veramente anca mia molje, anca ela, se in television la vede una pelicola che ghe toca sugar le lagrime cola tovaja, dopo la xe tuta contenta. Le babe le xe fate cussì.

Anca de picio mi ero un grando abitué del zinema.

Da noi a Fiume la scelta non mancava. Come giá ve go contado, noi muli andavimo spesso dai Capuzini, perchè lá costava poco - anche se i tajava sempre el baso final - e anca el "Odeon", in via Alessandro Volta - più che una Via la era una Riveta - el jera un zine considerado "pedocio", a prezzi popolari.

 

In zinema "Parigi" in Viale, ribatezado "Impero", quando che i franzesi jera diventadi "el nemico", iera bel perchè, con un biljeto, se vedeva due film uno drio l' altro, con in meso la Comica, el "Prossimamente, e el "Film Luce".

La "Sala Roma" in Riva, la jera molto distinta, coi abajour sul muro che se distudava pian pian. Un bel zinema moderno jera el "Centrale", in via Mameli, alias via del Fosso. El più importante e grande era naturalmente el teatro. "Feni

ce" - mi son nato proprio lá, visavì al civico numero uno de via Ciotta - indove che in platea, de drio, jera un recinto coi pasamani per i "posti in piedi" che i costava la metá dei altri.

El "Fenice" el gaveva poltrone imbotide e qualche volta me go portado a casa qualche animaleto domestico, de quei che dopo i salta in leto.

Qualche volta la domenica andavimo tuti in clapa in Casa Balila. Lá jera una sala co le sedie, stile '900, dure, de legno e tubi de fero, piturade cola lacca verde. I film jera quei dei "telefoni bianchi" col De Sica, Enrico Viarisio, Elsa Merlini, Umberto Melnati. Poi jera i classici italiani dei ani '30: "Luciano Serra pilota", "Squadrone bianco", "Noi vivi", "La cena delle beffe", con Amedeo Nazari, Fosco Giacheti, Rossano Brazi, Luisa Ferida, Osvaldo Valenti, Alida Valli. Go leto sul giornal che adesso par che i torna de moda.

 Qua in Germania Ovest stemo asistendo al grando risorgimento del film d' Arte. El più famoso regista el xe el Rainer Werner Fassbinder o meio el jera el R.W Fassbinder perchè el anno scorso, povero, el xe andado da Lukovich dopo che ghe se andada per tresso una bozza de wiski e una scatola de pirole de sonifero.

Purtropo questa mia pasion per el zinema artistico no la xe condivisa dai mii familiari. Mia moje una volta la xe saltada sula poltrona come un saltamartin, e la xe scampada fora dal zinema solo perchè in una pelicola a colori, apunto del Fassbinder, i ga mostrado per un ventizinque minuti a colori i detagli e i particolari de come i copa un caval in Macello Comunale del Francoforte.

Per essi, proprio sinzero, anche a mi me se missiava un poco el stomigo, ma: "Ars Magna Sic Cum Coradela Equis Est". Traduzion che non vol dir che se magna coradela in garbo: "l' Arte la xe granda anche se con budei de caval".

Comunque, se volè che ghe ve digo la vera veritá, anche a mi me piase ancora assai de più guardar Stanlio e Olio nel film "Fra Diavolo", indove che in cantina i se ciucia el vin al caratel che non - con tuto el rispeto - Fassbinder e i poveri cavai morti copadi.

 

Terlis  e  blu - gins

El mondo el se evolve. Tuto cambia. Sopratuto quela che cambia spesso e volentieri xe la moda. Che, se propio volemo, la moda torna sempre indrio. Bastaria salvar le straze vecie, che in giorno o l' altro le xe de novo moderne.

Guardè per esempio le cravate: prima le jera larghe, dopo strete come cordele, ogi in mesaria, e avanti cussì. Da quando che jerimo pici a Fiume, comunque le roba le xe cambiade, e come !

L' altro giorno in un scafeto a casa go trovado una fotografia de quando che mi ero un pisdrul de due ani, fata in molo San Marco, propio soto el leon, e mi gavevo un vestito lungo de pizo bianco cole scarpete che parevo una balarina del Lago dei Cigni de Ciaikoski.

Sì, perchè anca se ai muli de ogi ghe par roba dei tempi de Marco Caco, noi de pici, fino ai due anni, non gavevimo braghete, ma vestitini come le tate.

Vegno al punto dela ciacolada de ogi: "le bragne lunghe".

Tuta la nostra giovineza la jera tormentada dal problema de le braghe curte, che le dovevimo portar, indiferente estate o inverno, fino ai dodizi, tredizi ani.

Mi me ricordo che la mia mama la me gaveva comprado el primo vestito cole braghe "brigges" (breechs a mezzasta) quando che mi andavo giá alle inferiori del Tecnico de Piaza Parini.

Qua in Germania adeso i le ciama "Kniehosen" (braghe al ginocio) e le xe ancora parte integrante de l' alta moda estiva per la montagna.

Ciaro che a noi muli ne fazeva fota sta roba che non gavevimo le braghe lunghe. Le prime braghe lunghe mi me le go messe in tempo de guera, quando che gavevo sedizi ani e jero militar in te la Milizia Portuaria e fazevo la guardia col s'ciopo ai reticolati in Riva, in fondo de la piaza Dante.

Jero cussì contento de ste braghe lunghe che son andado subito de brivada da Fantini (Studio Fotografico) a farme far la fotografia co sto vestito novo, in pie, con la man pogiada sula colona-portafiori, come che se usava quela volta.

Quel che per noi muli jera una vera e propria "psicosi", dele braghe lunghe, ogi non la esiste più. Non dirìo che xe el contrario. Mia fia non la sa gnanca cossa che xe un vestito a cotola. A tute le ore del giorno, a scola, o a casa, o in "disco" - discoteca, indove un el xe orbo perchè xe tuto scuro e el diventa sordo e imatunido per el bordel che fa la musica - la xe sempre co ste braghete de terlis, che adeso i ghe disi "gins", che le xe blu, bianche, rosa o giale.

 

A proposito de discoteca, qua da noi la mularia la va in te le "Roll disco's" che xe una discoteca sempre in scuro e con i altoparlanti che rompi i timpani dele orecie, con in meso una granda pista indove che tuti i bala e i gira coi patini a rodele. Anche le babe, almeno qua da noi in Germania Ovest le xe sempre co ste braghe e i stivai che le me par tute la mula del musical "Annie get your gun" (Anna aguanta el sciopo).

 

Da noi a Fiume el terlis el lo portava solo el bandaio che el veniva a rapezar la gorna o a giustar la spina in cusina cola stopa e col grasso, e quel dela ofizina del gas in via del Aquedoto.

Ogi inveze, qua da noi, un per de blu gins veri "Levistrauss" - veramente de noi Strauss voleva dir un' altra roba - "Lee" opur "Wrangler" i costa un fotìo de bori che gnanca che i fussi fati de seda pura.

Mio fio, che el va in ginasio, anca lu più che braghe de terlis mastruzade e una maja con scrito suso "University of Maryland" no'l se mete mai. Adeso tuto se compra fato, tuto pronto, che le babe no le xe più bone o non le ga voja gnanca de impirar un ago e de tacar un boton.

Mia moje, onor al merito, le ghe gucia ancora ai fioi i gemper, de sera, guardando la television.

Mi me ricordo che quando che jero picio non jera assai fliche in familia e alora per el vestiario se se rangiava. Una volta xe morto un vecio zio (o squasi zio) e gavevimo ereditado, tra l' altro, un bel capoto novo, grando, de panno nero, col coleto de veluto. Mi andavo in terza o quarta elementare e alora de sto capoto i me ga fato un capotin de inverno e dopio peto, con due file de botoni de oro con le ancore, che el jera un bel bisù. Sto capoto, anca se nel fratempo el jera diventado corto, lo portavo ancora in quinta col maestro Santè, in piazza Cambieri.

Con mi veniova in classe el Publio Viola, Giorgio Piccoli, Aligi Moderini, Alfredo Poso, Tullio Schwarz, Marino Calochira, Renato Suttora, Ugo Rudmann, el fio del dotor Curri, i muli Andrioni e Tardivelli e altri che non me ricordo el nome. Ierimo in quaranta, li go contadi sula fotografia che se qualchedun la vol ghe la mando.

El Santè el jera un maestro assai bravo, magro, picio, con un poco de zirica, ocialin, col bafeto nero e le medaje dela Azione Catolica sul risvolto dela giacheta. El gaveva solo una manìa, quela: quela dei antichi romani. Bisogna dir che quela volta (ani trenta) jera assai de moda la "Roma imperiale". Pensè che in quinta elementare el ne imparava giá el latin. Quela volta gavevimo el traverson nero e el maestro Santè el nominava tra de noi muli i "capi" responsabili per la dissiplina e la condota de la clase, che i se ciamava "crenturione", "decurione", ecc.

Tuti coi gradi cusidi sul davanti, del traverson. I più diligenti, roba strana che ghe jero drento anca mi - lui li aiutava de dopopranzo a casa sua, indove che el ne legeva robe in latin.

Ogi, qua in tela mitteleuropa - i traversoni neri e bianchi i xe sparidi per sempre. Anche i fioi pici i va in kindergarten  (asilo) coi bluejeans mastruzadi e el pullover de la "University of Massachussets".

 

 

Adio muli. Devo corer a comprarme un per de braghe de terlis nove, perchè quele vecie le go tute frugade sui zinoci.

Cossa volé, volens o nolens, devemo adeguarse ai tempi.

Tempus fugit, braghe necesse est.

 

La  gloriosa  istituzion  del  "portapranzi"

Le vie del Signore sono infinite. E le vie e le strade dei omini le xe drite e le xe storte. Ancora ogi, milenovezentootantaquatro, per andar de Trieste a Fiume, passando per Erpele, Castelnovo e Matulie, per quanto i la gabi asfaltada e agiustada, tuta la strada la xe ancora quela che gaveva fato far - se non sbaljo - Napoleon Bonaparte.

Che po' lui nol gaveva fato altro che slargar quela dei antichi romani. Se un ghe fa mal el auto o la coriera xe mejo ancora ogi che el vada a Fiume in barca o col aroplan - che adeso el aroporto per Fiume i lo ga fato in te l' isola de Veglia.

Andando a Fiume, dopo Castelnovo d' Istria, la strada la xe tuta in discesa e ancora ogi la xe sta "curva de la morte", che magari de note e cola piova un el deve star assai atento. Se no inveze de andar a Fiume el va dal Lukovich.

Ve ricordé quando non ghe jera l' asfalto ? I nostri amici Fumi - el pitor Amato Fumi che el gaveva botega e magazin de piturazioni in via Carduci, proprio visavì de la Provincia - i gaveva nei ani trenta una bela Ford decapotabile, che quela volta la jera una roba assai rara, e la Meri Fumi la te guidava sta automobile, che ghe mancava solo el spolverin e i ociai de sofer e po' la saria stada come Tazio Nuvolari.

Qualche volta, de domenica, andavimo co sta auto in gita verso apunto Castelvovo a far marenda (adeso se ciama pic-nik) in campagneta.

Tuto bel e bon. Solo che quando che ne sorpasava la "Freccia del Carnaro", del Grattoni ("Fiume/Trieste" 90 minuti), col polveron che la fazeva, dopo che la era pasada erimo tuti sbianchisadi che parevimo i pek del Solis in giro per Valscurigna.

El bel iera, per modo de dir, anca che ogni volta la strada la jera in riva, dovevimo smontar e sburtar sta automobile che non ghe la fazeva più.

Quel che però iera propio assai bel per mi, jera la marenda.

La mia mama la fazeva sempre vinesnizel, carne apanada, che el jera comodo per portarse drio in carta oleada, e magnar fredo. De bever portavimo cafelate in tele boze quadrate de ojo de la Romsa, che le jera assai stagne.

Parlando de marende e de magnar portado de casa, mi volevo sempre ciacolar una volta de una gloriosa istituzion de la mia infanzia e giovineza, che go giá contado. La prima la jera el "pluzer", e cioè el portapranzi.

Mi credo che una generazion de operai, tornidori, mecanici, muradori, marangoni, elettricisti e manovai dei Cantieri, del Silurificio e dele altre fabriche e industrie de Fiume, i ga sempre avudo un tradizionale rispeto per sta "ciamemola" istituzion.

Per i non "adeti ai lavori" e per la mularia de ogi, ghe spiego che el portapranzi el jera come un astucio tubolar, fato de smalto, de solito blu de fora e bianco de drento, o de aluminio (modelo più moderno), con una maniza de sizza o de legno che el gaveva drento tre (o più) gamele, che le jera anca de fero smaltado, o de aluminio. Non steme domandar come che se ciama in italian, perchè non so.

La ultima gamela de sopra la gaveva un covercio che se incastrava e se ciudeva più o meno ermeticamente. Pensè che bel: el omo, quando che fis'ciava la sirena de mesogiorno, el molava el lavor e el andava incontro a la sua vecia, che apunto la vegniva de casa e la ghe portava el pranzo.

Pensè, de qua in Germania ancora ogi, operai e impiegati per sparagnar i se porta in fabrica o in uficio due fete de pan nero cola loganiga. Alora jera una roba assai distinta. L' ultimo pian jera el brodo, minestra o minestrina che fussi. In primo pian el gulas o el brodeto, e in tela gamela, al "pianteren", le patate in tecia o le erbete rosse. Pratico no?

Un momento: ancora una roba.  Patent ! Nei manighi de parte (laterali) dele gamele se impirava el cuciar, el cortel e el piron.

Mi me ricordo un witz che se contavimo quela volta. Jera una baba che smontando dal tram ai Piopi, davanti al Silurificio, la se gaveva intopado e la gaveva spanto el brodo del portapranzi. A un' altra baba che la ghe diseva: "Maico mila, che pecá..." la ghe gaveva risposto: "Non fa nienre, siora Tonza, tanto jera brodo brustolá".

Tornemo ale strade, Ma che progreso in soli zinquanta anni !

Qua da noi in Germania Ovest, come che ve go giá contado in una mia Ciacolada - indove che ve dixevo che guai a andar magnar o bver in autostrada - le autostrade (Autobahn) le xe nove, bele, larghe e non le costa gnente. La Germania Federal ogi la xe la unica nazion in Europa e mi credo anca nel mondo, indove che non esiste in autostrada limiti de velocitá.

Se vegnì de ste parti, ste atenti che anca qua, come dapertuto, xe anca mati che i ga assai sghei e poco zervel. Alora i se compra una "Porsche Super", che la fa dozentozinquanta a l' ora,  se xe nebia o jazo, gnanca per idea che i va più pian, e alora suzedi quei bei, come che i li ciama in tedesco "carambolagen", indove che xe un diziaoto auti impiradi un in tel altro e el elicotero che ingruma le vitime. Andè pian, muli.

Come se diseva quando che jerimo pici: chi va pian, va san e va lontan. Velocitá e stress le xe due robe che ghe rosiga el stomaco e el zervel de li omini de ogi. Scolteme a mi: andè pian !

3^ PUNTATA

Continuano le ciacolade dalla MittelEuropa

In Cripta de  Vienna  come  da  noi

Parafrasando el Sergio Stocchi, deverio scriver anca mi: "Sono stato a ..."  In una dele mie ciacolade gavevo scrito che me piaxeva asai Viena. Bon, una setimana fa son stado, dopo squasi un ano, de novo a Viena, e vojo contarve qualcossa de sta mia visita.

Viena la xe sempre una zitá assai grande e assai bela. Per mi che vegno da Francoforte, indove che tuto xe asai american e super - super moderno, xe assai bel veder tuti sti negozieti de roba de seconda man, tuti sti boteghini indove che i repeza e i agiusta de tuto. Qua da noi in te la Germania nisun agiusta più gnente e quando che se rompe qualcossa se buta via tuto, come in America.

Adeso i gá finalmente anca a Viena scominciá a agiustar e restaurar sti veci grandi palazi che - se no - veniva zo tuto, come in Citavecia a Fiume. Credeme, xe una beleza guardar sti viali longhi, che no i finisi più, coi lori bei alberi, ste ciese, ste statue e sti monumenti, sti ponti sul Danubio, e tuta sta bela roba che una volta i fazeva - inveze de far tuto in zimento - come che i fa ogi.

 

Da bon fiuman, anca se gavevo poco tempo - son andado a Viena per lavor a trovar clienti de la dita; go credudo fussi mio dover, o squasi, andar de corsa a saludar el vecio Francesco Giuseppe in te la Cripta dei Capuzini (Kapuzinr Gruft), in zentro de Viena, vizin del Duomo de Santo Stefano.

Devo dir la veritá che in sta Cripta un de noi, nato a Fiume de genitori fiumani e cressudo a Fiume, el se senti un poco come a casa. Drento lá xe tuti quei che, per un verso o per l' altro, i gá tuti avudo a che far cola nostra gente, cole nostre tere. Su la destra de Franzjosef  xe el sarcofago de sua molje, la Sissi, morta copada in Svizzera.

A sinistra xe el povero Rodolfo, el suo unico fio, che ancora ogi non se sa se el se ga copado lui o se i li ga mazadi a Mayerling, lui e la Maria Vetsera. A ela non i la ga ciolta in te la Cripta perchè no i jera sposadi e ela no la jera del Sangue.

Un poco più in lá xe el fratel de el Francesco Giusepe, el Massimiliano, quel che ghe ga tocado andar a far de Imperador ai messicani, che no i lo ga voludo e che dopo i ghe ga sbarado a Queretaro, apunto in Messico.

Massimiliano el gaveva fato far el castel de Miramar aTrieste, col parco che per mi el xe un dei più bei del mondo. El gaveria voludo abitar a Miramar in paze, con la molje, lá sul nostro bel Adriatico, a pescar scombri e sardoni. Invece, causa dela politica, i lo ga mandado in Messico, e dopo che i Messicani lo gá copado, la molje, povera, la xe diventada mata.

Il Castello di Miramare di Trieste.

Go visto che anche la Marialuisa, la moje de Napoleon Bonaparte - anca lui el xe andado a zercar disgrazie e el xe finido malamente - i la ga ciolta fra de lori in te la Cripta.

El custode dela Cripta - el gaverá un otanta ani - quando che ghe go deto che mi son de Fiume, el me ga streto la man tuto contento, e el me ga deto che per lui xe un onor gaver un vero fiuman che el vien a saludar quei de la familja dei Asburgo.

Che poi, se volemo, no i xe Asburgo, perchè la ultima dei veri Asburgo (Habsburg) la jera la Mariateresa e, dopo de ela, i xe ciamava de cognome "de Lorena Toscana" (Lothringen-Toskana).

El custode el ga voludo regalarme un libreto con le fotografie de tuti sti sarcofaghi, imponenti, enormi, tuti in argento e bronzo masicio indove el più bel xe apunto quel de la Imperatrice Mariateresa col suo marito, tuto in baroco-rococò.

A mi me ga un poco comosso el fato che sto mato me gabi tratado cussì, se pensé che ogni giorno lá vien una saja de gente de tuto el mondo. Ecco, Viena la xe un dei pochi posti in tel mondo, indove che un el pol dir "mi son de Fiume" e tuti lo trata come se el fussi un parente o un ex-parente.

Xe bruto far paragoni, ma che diferenza con la nostra Italia de ogi ! Anca i clienti che son andado a trovar a Viena, diretori de Case de Spedizioni, anca lori nei ani, apena che ghe dixevo che mi son de Fiume, i scominziava a contarme che anca lori i gaveva una zia o una nona, che el sozero de ela el jera andado de l' Ungaria a lavorar in tei legnami a Fiume e che a Viena tuti i se insognava de poder andar una volta in Abazia, che la jera per i vienesi come el paradiso terestre, ezetera, ezetera.

Savè che xe bel sentir parlar cussì dela nostra Fiume !

Non parlemo de el magnar a Viena, se no de novo i dixi che mi son solo un vecio bonculovich e gnente altro. Laseme solo dir che xe una bela roba poder andar in ogni local a ordinar senza problemi palacinche, gnochi de susini, strudel, coradela in garbo, o un qualsiasi dei magnari nostri. Tuti i xe cocoli a Viena, tuti i gá tempo.

Non come qua in te la Germania Ovest indove che tuto xe automatico, eletronico. Se un a Francoforte el telefona in Stazion per saver quando che parti un treno, ghe rispondi un "robot" che el se ciama "Karlchen" (Carleto) e che el ga una voze rusine, de fil de fero, che un ghe vien smisiamento de stomigo che te par de parlar - che Dio me perdoni - con un del oltretomba.

 

Xe bel saver che in tel mondo, in te la vecia Europa, esisti ancora una zitá come Viena indove che i omini i xe omini e non machine, e indove che i sa che jera, e cossa che la jera, un' altra zitá che se ciamava Fiume.

La  atmosfera  al  café  Havelka  a  Vienna

Mi credo veramente che la stirpe de la Mitteleuropa la xe una bona missianza. Basta guardar i mii fioi, de mama boema e pare fiuman, che i cressi qua in Teutonia, tochi de muli, sani de corpo e de spirito, sempre vizin ala tradizion classica dei usi e costumi dela Mitteleuropa, in particolar per quel che riguarda le palacinche.

Pensé che el mio Marco, che el primo de magio el ga fato quattordizi anni, el ga voludo che ghe regalo una "casseta" - i dischi qua i sparisi, adeso xe solo "cassete" - non  cola musica "rock" o "beat", ma el ga voludo la "quinta" (ta-ta-ta-taa) de Ludwig van Beethoven coi filarmonici de Viena direti dal Erbert von Karajan. Tradizion, apunto, de la Mitteleuropa.

A oroposito de Beethoven. Lezevo proprio jeri su un giornal, indove che un el scrive che i austriachi i xe assai fortunadi perchè tuto el mondo (o quasi tuto) crede che Hitler sia nato in Germania - inveze el xe nato a Braunau sull' Inn, in Austria - e che Beethoven - che el xe nato sul Reno a Bonn in Germania - el sia nato a Viena.

A proposito de Viena (ma cossa che me piasi a mi Viena !) i tedeschi qua i dixe che a Viena scominzia el Oriente e che Viena la xe giá Europa oriental o bacanica.

Forsi che xe anca vero. Infati, inte la periferia oriental de Viena - che la casca politicamente soto la republica federal austriaca del "Burgenland" - scominzia giá la "puszta" ungarese, che la xe una pianura senza fin, con un fotio de pascoli e de cavai.

Per mi però Viena la xe sempre, ancora ogi nel milenovezentootantaquatro, el zentro, la capital de la Mitteleuropa. Se per combinazion un giorno un de voi ghe capita de andar a Viena, ascolteme a mi, andè a una zerta ora - mejo de tuto dopo mesanote - al "Cafè Havelka" in zentro de Viena. Bon, lá ve parerá che el tempo se gabi fermado zinquanta ani fa. Sule porte de ingreso xe pesanti tende de corame, come che se usava una volta in te le ciese.

 

Ale due de matina el salon el xe pien, gnanca una carega libera. Impicadi in tele "steche" de bambù (ve ricordè ?) xe giornai in diezi o dodici lingue compresi el arabo e el ebraico. Sentadi su careghe e veci divani sfondadi xe un fotio de lori, zente de tute le raze e colori. Trapoleri, profughi, zifuti, studenti, disocupadi, un poco de tuto.

 

	Busti dei proprietari del Café Hawelka.

E se bevi café, o té, o punch sui tavolini tondi de marmo. Verso le due de matina la parona, la vecia siora Hevelka. la porta i "buchtel" vienesi, caldi, apena fati, che i xe come dei tochetini quadrati de pasta de biscuit o de pinza, con drento marmelada calda. Xe una atmosfera che mi ogni volta che vado lá me par che se tuto fussi finto e ricostruido in un studio de Holivud per un film de un romanzo de  Erich Maria Remarque, - quel de "Nulla di nuovo sul fronte occidentale" tanto per capirse - indove che tuti i sui personagi, e brei perseguitadi e profughi politici, i se remenava apunto a Viena o  Parigi in sti café, indove che se trovava quei che vendeva pasaporti falsi e procurava visti per i Stati Uniti.

Noi fiumani patochi jerimo, penso, e semo molto ligadi a sta gran bela zitá indove che jera nato e abitava Francesco Giusepe, che apena che el podeva, o lui o sua molje i tajava la corda e i fazeva un scampon a Ziquenizze o in Abbazia, che la jera la Perla dela Corona austro-ungarese.

Mi son nato a Fiume, soto l' Italia e de Fiume ungarese so solo quel che ne conta i Veci.

 Mi me ricordo però, che quando che mi ero picio, dixemo nei ani "trenta", la nostra Fiume la gaveva ancora una simpatica e indelebile impronta ungarese. Chi no se ricorda la pasticceria "Sari", el negozio de merceria "Vamos" in Piazza Principe Umberto e tanti altri nomi ungaresi classici ?

In vial, in tel cafè "Budai" - che dopo xe diventado "Pancera" coi sui biliardi e divani de veludo rosso, pareva oroprio de esser a Buda o a Pest. Ve ricordè che a Fiume in Cafè  el camarier el portava sempre sula guantiera picia la scudeleta de cafè nero col cuciarin e un bicer de aqua ?

A Trieste, al Cafè dei speci in piaza Unitá, ancora ogi el camarier in frac el ve porta sempre un bicier de aqua col cafè. Tradizio questa austro-ungarese ancora viva.

 

 

Qua inveze, in tela Germania Ovest, col cafè (slonz o sbicia che el sia) no i ve porta aqua perchè de qua ghe se drento abastanza.

E citando el vecio proverbio fiuman ... "L' aqua la fa mal e el vin el fa cantar" ve saludo per ogi.

 

Grill  Party

Che bel che xe far gite, escursioni, pic nic, ecc. fora in campagneta e sempre posibilmente vizin de qualche ostaria o betola con cibo e bevanda. Mi credo che noi fiumani semo specializadi in sto genere de ocupazioni a "tempo libero" come che xe dise adeso. Chi no se ricorda tute le nostre gite - che i romani dirìa "fuori porta" - verso Drenova, dal Vinas o dal Fabro a Zamet ?

Qua da noi in te la Germania Ovest, quando che xe la bela stagion, scominzia la epidemia del "grill" che la xe pezo de quela del colera o dela "spagnola" del milenovezentodiciaoto.

Basta che vegni fora un fiá de sol e che la temperatura la sia soprazero, tuti i tira fora gradele de fero, de ghisa, de lata, de oton de tute le marche e tipi, i core a comprar carbon dolze - che qua se compra in pacheti de carta eleganti nei distributori de benzina - e i taca a meter su ste gradele con loganighe de tute le grandeze e diametro.

Non come da noi, indove che le luganighe le iera de porco prasaz e basta. Qua i le fa de vitel, de manzo, de polastro, de misioti de coradela, polmon, insoma de tuto.

E alora, pasando davanti de le case, se sente sti odori e se vede sta fumera, che la vien apunto dai giardineti, pergoli, teraze, verande, indove che i rostise sula gradela.

Oltre ale luganighe ghe xe fetine, dotolete, polpete, galina, pessi, ecc.

I conzitadini Canguri e Pelirossi i me dirá che anca da lori se fa ste robe, solo che lá se ciama "barbecue". Comunque qua la gradela la xe diventada quel che in tedesco se dixe "status simbol", che saria (come el video registrator-televisor), che se non ti ga in casa un "grill" o una cassetta che registra i programmi TV, tuti te trata come un strazon e non i te dixi più bongiorno (Guten Tag) quando che i te incontra per strada. Tragedie sociali del consumismo.

Tornando alle gite, ve ricordé quel periodo dopo la fin dela guera, quando che i druzi i jera giá a Fiume, ma se viveva in una atmosfera de "non-so-quel-che-suzede-domani" e noi muli - ancora ignari della tragedia incombente e de tuti i campi profughi che ne spetava - zercavimo ogni ocasion per sentirne vivi e sgai.

Quela volta, apunto, mi sonavo la fisarmonica (mi gavevo una Paolo Soprani 80 bassi) e iero spesso e volentieri invitado in clape de muli e mule, che andavimo in Abazia, in Monte Magior e tuti i altri bei posti dela nostra Fiume.

 

Giulio con la sua fisarmonica rallegra

una classe femminile in gita.

Go trovado in un scafeto sta foto fata in maggio 1946 sula nostra bela spiaggia de Medea, tra Lovrana e Moschiena, indove che, con mi, xe fotografada tuta una clase dele mule dele magistrali, de Fiume, col professor.

Mi non me ricordo che classe che la jera, vedo presempio che due dele mule le jera sorele de mii amici Costiera e Zottinis.

Guardeve un poco sta fotografia: mi go la negativa e se una mula la jera lá, che la me scrivi e mi ghe mandarò subito una fotografia gratis, anche se la abita in provinzia de Mazara del Vallo, de Melbourne o de Chicago.

Adeso devo andar via perchè un mio amico gnoco el ga organizado un "grill party" con una cariola de luganighe e un caratel de bira e se non arivo in tempo i mati me neta via tuto ! Magnadora e bibita.

 

Sognar  de  Fiume

In te le mie ciacolade go giá scrito diverse volte dei profughi. El xe un argomento sempre de atualitá, specialmente per noi che semo profughi al zento per zento e che gavemo dovudo e voludo molar in bando tuto, lasando la nostra Tera natìa in man alo straniero.

Xe vero, per noi, fin da quando che jerimo muli, de lá del ponte de Sussak jera "estero", jera zente de altra lingua, de altri costumi. Non parlemo de "raza", perchè el xe un argomento poco simpatico, e perchè noi fiumani "veri" se guardemo la "raza" semo assai missiadi coi ungaresi, austriachi, dalmati e dalmatinski. La nostra lingua, cultura e tradizion le xe sempre stade quele italiane. E noi semo apunto profughi  ("refugees" per  inglese, o Flüchlinge per tedesco) de la nostra Tera che - dopo una guera balorda indove che non ga vinto nissun - i quatro "grandi" de quela volta i se ga messo dacordo che Fiume la pasava soto la proprietá teritorial dela Jugoslavia. Paese, se volemo, anca questo balordo in quanto che el xe nato dopo de la "Prima" Grande Guera metendo insieme in una pignata col nome "Jugo" (Sud) "Slavia" Sloveni, Croati, Serbi, Bosniachi, Erzegovini, Mazedoni, Ungaresi (Varazdin la xe ogi in Jugoslavia), Montenegrini, e chi più ne ga più ne metta.

De soto la Defonta, el governo de Viena, col baston e la carota - mola e tira - el aguantava tuti sti popoli, indove che ognidun el gaveva libertá de lingua e cultura, adeso i difeti de sto pasdrocc del 1918 i vien fora sempre de più e ogi tute ste nazionalitá le se barufa tra de lore e tuti i vol esser indipendenti.

Nel Kossovo un per de mesi fa jera un mezo ribalton e i ga dovudo serar in canon una saja de lori.

Noi inveze, de italiani che semo e che jerimo, non volevimo gnente, solo continuar a viver come che jerimo sempre vissudi.

Mi lavoro da ventizinque ani in te la navigazion e qualche volta - de note, quando che me sveio e fazo fadiga a indormenzarme de novo - sogno coi oci averti da una Fiume italiana, col porto de zona franca total, averto a tuto el retrotera, Austria, Ungheria, Zechoslovachia, altro stato pasdrocc indove che i Cechi e Slovachi no i va mai dacordo.

Va ben che in tuto el mondo i cantieri i xe in crisi, e che i siluri non i se adopera più, ma mi son convinto che con una Fiume ogi, in man ala iniziativa privata e non a una economia "socialista" , de marca comunista, poderiimo viver de signoreti.

Abazia, e tuta la nostra Riviera fino a Moschiena, saria un fiorir de turismo bel, elegante e decoroso, e non come adesso che xe i hotel novi, tuti in man al governo e dopo un per de ani i xe tuti ruzini che i par rovine del medio evo.

Ga mai fato qualchedun de voi sto pensierin ?

Mi lo fazo spesso, anca se xe poco probabile che el quadro politico de la nostra Europa el cambi in te le prossime generazioni, senza che vegni un ribalton general - che Dio ne guardi - con mazamenti e rovine.

I quatro gati che lege le mie ciacolade i se meraviiará che mi scrivo ste robe serie, o squasi, inveze dei soliti Wiz, ma ste robe bisogna dirle sempre de novo, perchè nisun le dimentichi.

Mi fazo sempre el paragon con le due Germanie, quela Ovest, (capitalistica), e quela Est (comunista) indove che qua da noi a Francoforte sul Meno  - come che ve dixevo - te par de esser in America, con le boteghe piene de ogni bendedio e la reclam in television, che te imatunisi perchè el tuo gato el magni "Kitekat" e non "Mizekat".

Da la altra parte - oltre el muro de zimento lungo dozento chilometri e con le mine anti-omo ogni tre metri, i xe anca tedeschi, ma con la falce e martel.

Presempio una naranza e altri generi "de lusso" i la vedi ogni morte de Papa, e se i vol andar in gita a Trieste, i la devi guardar in cartolina, perchè fora dei confini de la Repubblica "Democratica" (!) Tedesca - cussì se ciama ufizialmente la Germania Est - no i li lassa andar gnanca  de sabato o de domenica.

A proposito, ve ricordé quela canzoneta che cantava i "austriacanti" da noi, una volta, dopo Caporeto: "El general Cadorna el ga scrito ala Regina: Se vuoi veder Trieste, te la mando in cartolina ... ".

Mi jero a Trieste sta estate. Xe assai bel, ma assai caligo, el porto el xe svodo e non xe lavor. Anca qua, mi penso che una politica inteligente de zone franche gaverìa podudo salvar sta bela zitá de la tristeza de ogi.

Ma non volemo tristeze, e alora cantemo una canzon che canta apunto i triestini e che la rifleti la profonda filosofia dela lege de sopravivenza a disgrazie e miseria:

 

Viva lá e po' bon, xe un vecio moto triestin, chela vadi ben, che la vadi mal, sempre alegri e mai pasion, viva lá e po' bon.

Musati de Cherso, carte moschicide e cavai che tira i cari

Le stagioni le cambia e le va avanti una dopo l' altra, e noi ... anca. I muli i guarda sempre davanti, noi ogni tango guardemo un poco anche indrìo. La nostra identitá de fiumani patochi la gavemo sempre e ... guai a chi ne la toca.

Mi, come tuti noi del resto, me son trovado, dopo del Esodo, in giro per l' Italia, che i me diseva - e ancora in italia i ne ciama cussì - che noi erimo giuliani, istriani e dalmati.

Mi me ricordo inanzi tuto, per mi "Giuliano" el jera un mio amico che el abitava in Bonaroti e niente altro, che per noi a Fiume i "istriani" i jera foresti e, per dir la veritá - senza ofender nissun - per noi zitadini de la Capitale del Quarnero, i istriani i jera un poco come dir provincialoti e zobani; ripeto, senza che nisun se senti ofeso.

Dalmati non semo sicuro. Dalmazia xe Porto Re, Bucari, Cirquenizze, de dove che la jera la mia nona, Zara, Sebenico, Spalato e Ragusa. Zerto che mi, ben o mal, mi son giuliano - ripeto, mi me ciamo Giulio e son fiuman - dovemo capir sto "inserimento" in tel grupo dei "profughi giuliani" in quanto la nostra Fiume, pur essendo famosa in te la storia europea (grazie al Comandante) la ga dovudo seguir lo steso triste destin apunto dei polesani, dei zaratini, del lussignani.

Parlando de Lussin e dele nostre bele isole, quando che jero picio andacvimo qualche anno - come che se usava in tele familie "per bene" - in vilegiatura a Cherso. Mi me ricordo che el mar jera limpido e ciaro e che se andava in acqua zo de la riva, con due o tre scalini.

 

Famosi i jera in Cherso i "buzolai" fati col miel e fighi, neri de fora e rossi sugosi de drento.

Quei che non mancava mai, a Cherso, jera i mussati. Per non morir dissanguadi, de sera, in camara, impizavimo i "zampironi" a forma de piramide, che i fazeva una fumera che se un nol moriva disanguado el moriva sofigado.

Comunque jerimo anca contenti quando che, finite le vacanze, tornavimo col vaporeto a Fiume, indove che non gavevimo buzolai, ma gnanche mussati.

Parlando de roba dolze - e qua el mio vecio amico fiuman el dirá che casco de novo nel mio vizio de ciacolar solo de magnar e bever - in tele mie ciacole impegnative me son dimentigado dele nostre "mulze".

Per chi non lo savessi e per la mularia, le "mulze" - quele fresche noi le compravino sempre da le babe al mercato in Braida - le jera loganighe fate de sangue fresco, con drento risi cusinadi, zucaro e zibibe. Le se tajava a fetine e le se friseva in padela in tel butiro, e se jera una roba assai, assai bona.

Tornemo ai mussati e a le mosche. Sicome che nela nostra infanzia e prima giovineza i trasporti de merce e coletame i jera ancora fati per la magior parte col caro e cavai (vedi: Sabiza, nostro Transport Center dei cuceri) jera dapertuto carigo de mosche e mosconi. In ogni quartier, in ogni cusina picava una "carta moschicida" o nastro che fussi, che quando la se impiniva apunto de mosche e che quando la jera tuta nera la se butava in scovaze e se impicava una nova, tirandola fora pian pian dal rotolo de carton.

Parlando de cari e cavai - a mi spesso la memoria la me fala - chi xe che se ricorda e che me dixi come che se ciamava quela baba, el unico cucer femina a Fiume, che col caro a cavai la pasava de Bonaroti fumando spagnoleti fati con "trinciato forte" e carta de giornal (La Gazeta delo Sport o la Domenica del Corriere) ? Aiuteme muli, che l' etá la scanzela memorie dei ani che furono.

Qua in Germania Ovest cavai - oltre de quei poveri che ghe toca corer al galopo ale corse - se ne vede ancora in zitá con i cari dele fabriche de bira, carighi de caratei, tiradi da do o tre cubie de sti cavaloni bei e forti, che i va in giro ogni tanto per farghe reclam apunto ale birerie. El cucer el se veste coi botoni de oton e la traversa de corame.

 

Se volemo parlar de trasporti zitadini a Fiume, non se dimentighemo de la prinzipal arteria de trasporti pasegeri che jera el tram da Scoieto a Cantrida. Senza andar ogi in particolari, permeteme solo un "flash", una imagine che me xe rimasta nei oci. Me par come se fussi ogi, quando che andavimo in bagno in clapa a Cantrida.

Le mule sul tram, sule "giardiniere" estive, averte con le tende che svolazava, e noi muli drio in bizicleta. In ogni fermata, Ospidal, Giardin Publico, Casa del Emigrante, Piopi, le mule le pasava da la ringhiera de drio del tram un toco de strudel o de oresgnazza, secondo la bona e antica tradizion fiumana, indove in tele gite, escursioni, ezetera, jera sempre le mule che doveva proveder ale vetovalie e che le jera responsabili de la magnadora. Tradizion che risale ale "vivandiere" de Napoleon.

E con un "eviva" ! per le mule fiumane, ve saluto per ogi.

 

Chilometri  de  acompagnamenti

Propio ieri parlavo per telefono con un mio corispondente de lavor che el xe a Viena, un zerto Filipovic', che lui veramente el xe zitadin "jugo", ma insieme parlemo sempre in fiuman patoco, e el suo el xe mejo del mio. Quando che gavevimo finido de ciacolar el me ga deto "adio, boh". Se devo contarve la vera veritá, mi me gavevo dimenticado de sto nostro saludo fiuman, indove che el nome de Dio el xe in te le due lingue, talian e crovato.

Ogi però volevo contarve un' altra roba de quando che jerimo muli, che la me xe venuda in amente. Ieri, la mia molje, pasando in auto la ga visto per combinazion el nostro fio Marco (quindizi ani) che el acompagnava a casa una muleta che la va in classe con lui in ginasio.

El mulo, per dir la veritá, el se dedica assai a sta ativitá che la ghe piase assai de più che non studiar i verbi semi deponenti in latin.

Da noi se dixe che "el pomo no'l casca lontan de l' albero".

Se mi gaverio tante lire (non digo Marchi o Dolari) come quanti chilometri mi go fato a pìe quando che jero in quei ani che el Giacomo Leopardi el dixeva "Ti se ricordi Silvia, quando che beltá fiorìa" ?

Mi acompagnavo le mule a casa e mi credo che sarìo ogi miliardario. Quela volta la jera una ativitá a "sorpresa".

Quando che ti ghe disevi ala mula "posso compagnarla a casa" ? sicome che tuta la fazenda la jera "pedibus calcantibus" e non come ogi con la automobile, che la xe diventada - anche se semo diventadi trenta ani dopo de i americani - simbolo de la generazion de ogi, in quanto i tre quarti dela nostra vita tuto suzede in auto, comprese nassite, morte, fidanzamenti, più o meno ufizialmente.

Dunque, ve dixevo che, se la andava ben, alora la mula la abitava in giardin publico (Mlacca), in Braida o in Scojeto. Se la andava mal la abitava in fondo a la via Santaentrata o dopo i Salesiani. Dopo che ti gavevi lassado la mula sul porton, senza gaver avudo el coragio de darghe un baseto, te tocava pian pianin, a ora tarda,  tornar a casa.

Mi me ricordo come se fussi ogi, le strade non asfaltate de sera tardi, de estate, senza un can, con sti ferai impicadi sui,pali de legno, che se ti metevi la orecia sul palo ti sentivi buligar i fili del telefono, o dela corente. E intorno dele lampadine - che le gaveva sora el piatin de smalto bianco, piùo meno macade dei sassi che la mularia ghe tirava - girava i nostri picoli pipistrei domaci, che anca quei - come che ghe dizevo l' altra volta - i xe sparidi per sempre sterminadi da DDT e le altre sporcherie che i le inventa per invelenar el mondo !

Che bel che jera, nissun gaveva paura de girar solo de sera tardi per ste strade deserte. E nissun pensava al mal.

 

Ogigiorno un gnanca nol se sogna de girar solo de note, e non a Chicago o a Milano-Bovisa, ma gnanca qua in tela Germania Ovest, indove che non esiste ancora, ne' scippi, ne' cortelade per portarte via el tacuin come in Central Pask a Neviork.

Se ve ricordé, poco tempo fa un fiuman "canguro" el scriveva che anca da lori in Australia - indove che due ani fa i podeva lassar averte le porte dele case senza ciuderle cola ciave - adeso tuti de sera i se spranga drento perchè anca lá non xe più sicuro de girar de sera per strada e xe carigo de smaferi.

Non semo arivadi ancora al punto de Milano, indove che molti de quei che conosso mi in quartier i ga la porta blindada, ma xe zerto che el mondo, inveze de diventar più tranquilo e in paze el xe sempre più in malora. Ruberie e mazamenti xe roba de ogni giorno e anca qua, come digo, in un paese dove xe (o jera), ordine e dissiplina - sopratuto quando che qua comandava Bafeto - presempio le biziclete i le grata a biondo Dio, pegio che in tela pelicola che ve ricordé del Vitorio Desica "Ladri di biciclette".

El anno scorso i ga scanzelado fora le biziclete da la assicurazion sui "beni domestici", perché i diseva che se no, coi rimborsi le assicurazioni saria andade a potloch, ma mi non ghe credo.

Mi me ricordo che a Fiume - dopo la mia "Bianchi" nera de seconda man: 90 lire - la mia mama la me gaveva comprado da Cacciolato in via Parini, che el gaveva una bela botega, una "Volsit" nova, color verdolin, col portapachi sul manubrio e - quel che jera el "dernier cri" - i cercioni de legno, che noi diventava mai ruzini.

Nissun sgranfignava gnente quela volta a Fiume e mi lassavo in Via Giotto la bizicletta davanti el porton de casa col pedalin sbasado e pogiado sul marciapiede. Come che ve contavo, el nostro "velodromo" el jera el piazal del zimiterio de Cosala e de lassù se plozkavimo come un Blitz (diria qua i gnochi) zo per via Vasari, Belveder e Bonaroti. Mi me gavevo imparado a far el giro del Governator de brivada "senza mani".

Tornar a casa la jera un' altra storia, conveniva portar la bizicleta in spala, suso per la scalinata de Via Segantini, fino in Via Cellini. Pasando dala via Pomerio, sul canton apunto de la salita Segantini, sula destra prima del Sanatorio, jera la baraca del barbier Fereti, che el jera el mio barbier pima che andassi dal Virtich, in Belveder.

 

Mi andavo volentieri da Fereti perché el gaveva sempre el ultimo numero de "Il Travaso delle Idee", quel cola sopracopertina color arancion, che quela volta el gaveva la fama de esser un giornal un poco "spinto",  con le barzelete solo per adulti. Non zerto de far paragon con il "Plaiboy" de ogi.

Mi comunque in bizicleta vado ancora e me porto sempre drio una bela cadena e un grande lucheto. Adio muli, me racomando, ocio ai smaferi.

 

4^  PUNTATA

Continuano le ciacolade dalla MittelEuropa

Marende  e  marendini

Tanto per cambiar, el lupo perde el pelo, ma non el vizio, stavo proprio ieri fazendo un pensierin sule abitudini culinarie e magnative dei diversi popoli e paesi. El talian, presempio, italiano Regnicolo, come che ghe disevimo noi, de matina nol fa marenda, o squasi. Tuto el mondo el sa che la "Prima Colazione" o "Breakfast" o "Frühstück"  del italiano, da Milano a Roma, xe la famosa brioche col capucino. Andando un poco più in zo, a Napoli, lá adiritura de matina i bevi una "tazzulilla" microscopica de cafénero e basta, tirando avanti col stomigo svodo fino a la ora de pranzo, che in Italia i lo ciama colazione e che la xe verso le due o le tre de dopopranzo. In compenso la zena la xe ale undizi de sera.

Noi fiumani a Fiume de matina - anca perchè de inverno cola bora e col jazo ghe se voleva calorie - magnavimo una bela marenda.

Mi me ricordo che quando che jero picio, prima de andar fora de casa per andar a scola in Piaza Cambieri, la mia mama la me preparava sula tavola dela cusina una granda scudela de quele tipo terina, senza manighi, col late bojente, col "skropich", zucaro e drento inzombadi tochi de pan.

Se dopo de la zena del giorno prima jera avanzade un due patate in tecia, e un pochi de fasoi in garbo, mi magnavo anca quei.

Dopo l' esodo la magnadora la jera assai scarsa, e nei due ani che go fato a Brindisi in un "campo profughi" che se ciamava "Collegio Tommaseo", non jera assai de frajar: fame nera e le marende se le sognavimo de note.

Dopo go navigado come Comisario de Bordo, oto ani sule navi de pasageri. Presempio sule navi del Lloyd triestino, la "Victoria" e la "Neptunia" in mensa ufficiali ("Saletta Ufficiali") de matina col café se magnava kaiserize col butiro e la marmelata.

 

Nave "Victoria" del Lloyd Triestino

Sule barche dela Sitmar "Fair Sea e "Castel Felice", che andavimo a Melbourne e a Sydney, e i concittadini canguri i se le ricordará - de matina el camarier el ne serviva in Saleta bei tochi de focacia genovese, fata con l' ojo de oliza e le zivole.

Nave "Ascania" della Soc. Grimaldi

Co navigavo cola Grimaldi, che el xe anca ogi el mio paron, sula "Irpinia" e "Ascania" per Quebec e Montreal (de inverno, quando che el San Lorenzo el jera jazado) andavimo a Halifax). Mi jero l' unico "nordista" tra tuto l' equipagio de Tore del Greco e Castellammare di Stabia e Meta di Sorrento, e i ne dava col café una buonissima e bula pizza margherita coi pomodori, ojo, origano e mozarela bela croccante, apena tirada fora del forno, tajada in tochetini quadradi.

Dopo go visudo in Inghiltera, e anca lá - sicome el apetito no'l me manca mai, seguivo el moto: "When in Rome do as the Romans do" che veleva dir, che quando che ti son in un Paese foresto ti devi magnar le pomìe che i magna lori.

Dopo el "Early morning tea" che xe una scudeleta de tè senza gnente, che i te porta ale sei o ale sete de matina, tanto per slavazarte el gargato, al Breakfast fazevo fora una piadina del "Porridge", che xe una specie de impiastro de cola caravela-tacatuto. Dopo, un mucio de tost e ovi cola panzeta, loganighete color grigio rosa, roste, aringhe scaldade sul gas (Kippers) e marmelata inglese de naranze.

Adesso, qua in Germania Ovest seguo sempre el stesso moto, e i tedeschi, grazie a Dio, i ga la bela abitudine de far de matina a casa - prima de andar a lavorar - una bela e sostanziosa marenda. Alora, ogni giorno, ale sete e un quarto de matina, cola mia moje e con i mii due fioi Marco e Cristina - la mula la xe un poco squinzia col magnar - col café bevo el té, che go imparado apunto in Inghiltera, e me xe rimasto el vizio.

Non manca mai, sula tavola, un due struze de pan, bianco e nero, butiro, marmelate assortide, yogurth, fetine de salame e persuto, formagio, perchè fino a mezogiorno no se mori de deboleza.

A proposito de marende e marendini, ve ricordè le marende de mesa matina ala Picola Borsa, visavì el zinema Sala Roma ? Una picola de gulas, o una picola de tripe o un "Salzstangher" taiado in mezo con drento butiro, persuto coto e un peveron verde de quei soto azeto. Usanza questa - del merendin de meza matina - pretamente vienese.  I fiumani, a Fiume, devemo proprio dir che i se tratava ben.

Se ti andavi alla stessa ora drio del del canton verso la Tore, in via Machiavelli - proprio visavì de la Ciesa dei Greghi - lá jera un Buffét che frequentava dotori e avocati, indove che se magnava ostrighe fresche con un bicer de vin bianco domace.

Sicome che xe le undizi e mesa e mi go un poco del languor in tel stomaco, ve saluto e vado de brivada a far un spuntin de porzina e capuzi garbi, tanto per non perder la abitudine.

A Fiume se diseva: "Che Santa Luzia te conservi la vista, perchè el apetito non te manca".

Adio muli.

 

El  cucer  donna  

Se devo esser sinzero - e credo che gaveré capido che sinzero son sempre, anca tropo - a mi me fa asai piazer che le mie Ciacolade non le resta "letera morta". Vojo dir che i fiumani i me risponde e me ariva bele letere dal Canada - che una volta noi ghe dixevimo Canadá, e anche de altri Paesi indove che i fiumani i xe arivadi, i se gá fermado, e lá i lavora e i magna.

Alora sì, che la xe veramente una Ciacolada, e non un Monologo, come qual povero, palido principe dela Danimarca, el Amleto, che nol saveva mai se esser o non esser.

L' altro giorno me ga scrito el Aldo Stepcich de Wintertur (Svizera), e el me ga risposto ala mia domanda se qualchedun de noi el se ricordava ancora de quela baba che la pasava in Bonaroti con caro e caval. Mejo de tuto ve trascrivo tal e qual quel che scrivi el Aldo.

"Ti domandi dela Baba che la andava col caval.  La ga la sua storia. Essa la xe diventada cucer perchè el marito gaveva ciapá una piada dala cavala e dopo de sto incidente la molje doveva darghe de magnar e netar la cavala de matina presto. Lui el jera pasá ale dipendenze del Calimici, in via Firenze, sora del Vescovado, che el gaveva l' ingrosso e el detalio de generi alimentari, mentre el suo fradel el jera in zitá vizin ala Pescaria, con magazin al ingrosso.

Sposadi con Panbianco, che i proveniva dale Marche. Una Panbianco in via Firenze, una in Braida, sposada con un fiuman, Micoletich, e del fradel del Panbianco, in via Belveder, per andar in Zimitero.

Essa, la cucer, la doveva servir tuti i comestibili con farina, zucaro e pasta, ma se ti me domandi el suo name, mi non lo so".

Grazie Aldo !  Informazioni,  le tue, assai complete.

Ma senti adeso cossa che me xe tocado l' altro giorno. Sicome che qua, in sto Paese de Teutonia, un agiorno piove e el giorno dopo neviga, indiferente la stagion, mio fio Marco, domenica - sicome che jera apunto bruto tempo, un slavaz che no ve digo, el me ga strassinado a Francoforte a veder el novo, anzi novissimo Museo del zinema, che tuti i giornai e la television qua in tela Germania Ovest ga deto e scrito che xe la meravilja dele meravilje e unico al mondo.

Tuto assai bel (ingresso gratis) zinque piani con le scale de marmo bianco, e tute ste crame e sti rochei veci co i fazeva le pelicole mute, tuto roba assai antica. Mélies, Lumière, insoma propio tuto assai bel e assai interessante. In una vetrina, fra apunto i tochi più antichi jera diverse machine e machinete dela, come che i la ciama qua "Lanterna Magica" (per tedesco se pronunzia Lanterna maghika) e a mi, credeme, tutintun me xe vinù un meso colpo e me son detto - pianissimo, come in tele  sinfonie de Beethoven - che nisun me senti: "Giulio mio, ti ti se credi de esser giovanil e sportivo perchè sta estate ti se ga rampigado sul Passo Santner sule Dolomiti, e sto inverno ti ga fato un poco de sci de fondo, e inveze qua xe la prova lampante che ti ti son un vecio bacuco, un antenato, una mumìa, pegio de quele dele Piramidi del Egito".

 

Infati, ste "Lanterne Maghike" non le xe altro che quele trapole de quando che mi gavevo sei o sete ani e la mia mama la lavorava de levatrice in Ospidal de SS. Spirito a Fiume e mi andavo a giogarme con la Wally Loriani, la fia del Aministrator, apunto, del nostro Ospidal. Essa, e el suo fratel, che i lo ciamava Itty, in sofita i gaveva una scatoleta nera de lata con suso un picio camin de stufa, che ghe se impizava drento una candela e se impirava de una sfesa de parte una strica de vetro con le figurine, e poi sul muro bianco dele scale se vdeva a colori sti pupoli ,che noi muleti jerimo tuti contenti de gaver el nostro zinema privato. Ma voi guardé cossa me toca, aimemeni !

Qua i dise che sta roba xe roba de antichitá e che la xe una raritá cussì preziosa che i la ga apunto serada in sta vetrineta in Museo.

Tornadi ai ricordi del Ospidal a Fiume, a guardar sta Lanterna Magica veniva anche la Silvana, mia coetanea e amica inseparabile dela mia infanzia. La Silvana la jera fia del Nino Udovini, toco de omo, portinaio del Ospidal. Lori i abitava in quela caseta sula sinistra dela entrata del Ospidal.

La Nela, la mama dela Silvana, molje del Nino, la fazeva la sarta e la jera assai brava. La ghe insegnava anche cusir ale mulete.

Mi me ricordo che jero picio, ma che però - essendo, anche a sei ani, omo mas'cio - non podevo andar in tela camara indove che le cusiva, perchè drento le jera sempre signore in combiné che le provava i vestiti.

Dela nela devo anca dir che la fazeva el miglior Gulas ungarese de Fiume e dintorni.

Semo tornadi alla magnadira, e perchè no ? Buon apetito, muli.

 

Trasporto Emigranti

In una altra ciacolada, tempo fa, mi ve contavo cossa che i ne dava de magnar per marenda quando che mi jero "maritimo". Infati mi go navigado parechi ani da "Comisario de Bordo" sule barche de pasegeri che le andava su e zo per i ozeani.

Mi go fato tre ani sula rota Genova / Hong Kong passando per el Canal de Suez, Aden, Caraci, Bombay, Colombo, Giacarta e Singapor.

Un per de anni cola Grimaldi per el Venezuela, prima e dopo per el Canada. Gò trasportado anca per un anno negri dela Giamaica, e de tute le picie isole dei Caraibi, in Inglitera, e con la Sitmar - come che ve dixevo - andavimo dala Germania del Nord (Bremenhaven e Cuxhaven) fino in Australia e Nuova Zelanda.

In Australia andavo anca nei anni 1956 - 1957 cola "Neptunia" del Lloyd Triestino, indove che in andata metevimo i emigranti italiani nei cosideti "cameroni" e nel ritorno smontavimo i leti de fero "a castel" e sti cameroni, che cussì i diventava "stive" e li impinivimo de bale de lana dele pecore australiane.

La Neptunia la era una bela barca nova, de 11.000 tonelate, ma non la jera sicuro una nave de lusso. E non la gaveva "aria condizionata". In sti "cameroni" dormiva una sessantina de lori.

 

Nave "Neptunia" del Lloyd triestino

Logico, ghe jera i cameroni per i omini e quei per le babe, separadi.

Capolinea jera Genova. De Genova, in partenza, andavimo prima a Napoli, indove che imbarcavimo i emigranti dela Lucania, Abruzzi e Molise, e dopo a Messina, a cior quei calabresi e siculi. A Messina, apunto, i imbarcava i emigranti Siziliani, familje intere indove che - come che ve dixevo - i omini i dormiva in un camaron e le babe coi fioi in un altro. El fato el jera che ste done siziliane - mi me ricordo come se fussi ogi - sia giovani che vecie, le jera tute quasi sempre vestide de nero: tuto nero, vestito, calze - sempre cole calze, anche de estate - scarpe, e fazoleto in testa.

Per tuto el viagio de Messina, a Sydney o Melbourne no le se cambiava, e le se lavava assai poco, perchè el prete, in paese, ghe gaveva deto che lavarse, specialmente fora de casa e in zerte parti del corpo, xe pecato.

Figureve voi, in Mar Rosso, apunto con un sofigaz de 40 gradi a l' ombra, drento de la nave, una sessantina de ste babe, che le dormiva insieme in sti cameroni.

Ale sei de matina ghe fazevimo la sveja tipo Caserma, e quando che tuti i jera andadi a far marenda, vegniva el Nostromo, coi marineri cole scornje e cola manigheta de aqua misciada con cloro, i slavazava ste camerate per disinfetar tuto e cavar un poco de spuza.

Quando che gavevimo pasado Capo Guardafui - dopo de Aden indove che finissi el Mar Rosso - tra magio e settembre ciapavimo tutintun el "Monson", tipo la Bora da noi, e sta nave la balava e saltava come un toco de crodiga che la boje in tela pasta e fasoi.

Sti poveri mati, che i vegniva de l' interno della Sizilia e dale montagne dela Calabria - gavé forsi visto el film de Charlot "L' Emigrante" ? - I jera tuti a potlock col mal de mar, stravacadi in coperta, imatunidi, più morti che vivi. Co ti ghe domandavi cossa che i voleva magnar, i te rispondeva con una voze de fil de fero "ulive niver" (olive nere) che per lori, se vede, le jera come la razion de emergenza quando apunto che  i jera a pajol col stomigo.

Co jera sti giorni de marèta, figureve voi che saja de schei che se meteva in scarsela el Capo Comissario - mi jero quela volta solo Alievo Commissario - in societá col cambusier e col capo cogo (el "Chef") bori sparagnadi sula panatica de otozento pasegeri che no i magnava gnente, solo olive nere.

Sicome che la magior parte de sti poveri emigranti no i saveva ne' leger ne' scriver, alora, prima apunto de cominciar el Ozeano Indiano - in Mar Rosso, col mar in bonazza - li metevimo in fila per uno in coverta, e noi sentadi con un tavolin cola machina de scriver, che ghe impinivimo per lori i formulari per la Dogana e la Imigrazion australiane, che le jera assai severe co ste formalitá.

Emigranti per le americhe.

Steamship Historical Society Library. University of Baltimore.

El bulo jera che mi, pur essendo fiuman patoco - semo rimasti in pochi de quei veri - me son sempre rangiado assai ben a parlar in lingua. Bon, sti mati, spezialmente quei che vegniva dall' interno dela Lucania - mi me ricordo che no i capiva gnanca una parola de quel che ghe domandavo. Per dir la veritá no li capivo gnanca mi. E alora go dovudo cior un interprete, un zerto Loffredo de cognome, che el jera a bordo el mio assistente - la sua qualifica a stato paga la jera de "Amanuense" che el parlava el dialeto dela Lucania.

Cossa volé, jera altri tempi e ogi semo tuti ben atrezadi, specialmente qua in tela Germania Ovest, col bagno in quartier, cola vasca, docia, bidé, aqua calda e freda, savon, savoneta, sciampo, sc'iuma de bagno e de barba, crema per i brufoli, deodorante a spritz (spray), ezetera, ezetera.

Quando che mi ero picio, in Bonaroti, gavevimo sì un quartier grando, ma i impianti igienico - sanitari  quela volta no i jera tanto moderni. De inverno e anca de estate per far el bagno la jera una zerimonia tipo quela che ancora ogi i fa i Giaponesi in Giapon.

Strassinavimo in cusina una bela mastela de zingo cole manize e dala caldaia del sparghert ciolevimo aqua bojente e la slongavimo con quela del scafo. Un bel toco de savon "Marsiglia" , de quel bianco, quadrato, e una scartaza per russar via la cragna.

Sicome non jera che el bagno se podeva far cussì spesso, alora ogni volta, dopo finido de lavarse, mi me ricordo che restava sula mastela un orlo nero. e quando la mia mama inveze la me lavava la testa in tel cadin sula tavola, dopo la me meteva sui cavei un mezo bicer de azeto perchè, i dixeva che el rinforzava i cavei.

Quel che jera assai bel de noi jera che i Bagni Publici in Scojeto, che i gaveva camarete cola vasca quadrata, sbassada soto del pavimento, con due scalini per calumarse drento, cole tavele blù ciaro, che mi pensavo sempre ale Mile e Una Note, indove che gavevo visto in una pelicola in Zinema Fenice, che i gaveva le vasche fate cussì, ma cole babe del Harem drento. Tipico in Scojeto jera anche el lavatoio indove che le babe le resentava la lissia in tel' aqua corente, freda jazada anche de estate.

Ogi xe tuto machine lavatuto, automatiche, eletriche, eletroniche, e la ativitá fisica del omo e dela dona, fra poco la sará solo quela de strucar un boton.

Me racomando muli, laveve ben e non ste sparagnar savon, che xe tuta salute.

Mi spero solo che i "ecologisti" no i protesti per salvar la vita dei poveri microbi e parassiti umani diversi, pedoci, zimisi e piatole, che cola igiene moderna i xe in fase de estinzione, come le balene e i elefanti.

 

Colonia  marina  di  Roio  (L'Aquila)

Sempre zercando fra i strafanici de quel famoso scafeto, go trovado stavolta una altra cartolina con indirizo: Famiglia Scala, via Giotto 4, Fiume. El timbro postal el xe: AQUILA, 10 settembre 1938 XVI, e dopo, vizin, un altro timbro lila, sbiadido: Ente Nazionale Assistenza gente di Mare - Colonia Montana di Roio (L' Aquila degli Abruzzi).

Sul davanti dela cartolina xe una bela fotografia de grupo: trenta muleti, tuti col capelin bianco dela colonia, un che el aguanta una stanga col galiardeto e una bela signorina cole dreze nere rodolade sula testa, come che se usava quela volta, che la xe la vigilatrice.

Drio se vede, sula cartolina, una granda scola, cioè la colonia, tuta nova a quatro piani, cole finestre assai grandi.

 

La Colonia Montana di Roio (L'Aquila)

Iera apunto nel milenovezentotrentaoto che de Fiume, ala fin de agosto, semo partidi col treno una saja de mularia.

Mi gavevo nove ani. El treno jera stado organizado dal Dopolavoro Italiano Marina Mercantile per un periodo de ferie in montagna sul Gran Sasso d' italia. Per mi jera la prima volta che andavo via de casa. Gavevo sì fato viagi in vaporeto a Cherso e a Zara, ma sempre cola mama.

Se parlemo de Zara, mi me ricordo che una volta, tornando apunto da Zara, col vapor che el jera el "Ipparco Baccich" dela Fiumana di Navigazione, la mia mama - mi jero assai picio - la me gaveva imbotido el capotin de tabaco e café, perchè a Zara lá jera tuto bon prezzo, franco de dogana e dazio, e quando che arivava el vapor a Fiume, in molo Ancona, la dogana ghe fazeva la visita solo a omini e done. Le done, le palpava una baba dela dogana.

Alora mi me ricordo che in sto treno in scompartimento, coi sedili de legno, i ne gaveva dado un fotio de biscotini e de ciocolata per farne star boni. In agosto, a Fiume, jera abastanza calduz !

Savé però che jerimo assai malignasi de muli ! Penseve che quando el treno el se ga meso in moto in direzion de Trieste, vojo dir verso Matulie, jera un altro treno che el arivava in Stazion, e i due treni, tuti due coi finestrini aperti per el sofigaz che jera, i pasava un vizin l' altro abastanza pian e in senso contrario.

Noi muleti gavevimo sta ciocolata tacaiza in man, e alora, visto che i treni i se moveva, ne xe venuda la bula idea de tirarghe sto smir de ciocolata in muso ai mati e ale babe del treno visavì. I jera cussì imatunidi dela sorpresa che no i jera gnanca boni de aprir la boca per protestar. Xe sta un spetacolo che mi me ricordarò fin che vivo: sti disgraziadi che i se forbiva sta ciocolata dal naso e dai oci.

Mi credo veramente che quela volta mi, e forsi anca i altri muleti, jero apena fresco dela letura del libro "Il Giornalino di Gian Burrasca" de "Yambo" (Silvio Spaventa Filippi) indove che el mulo el combinava sti tiri spesso e volentieri. In viagio cantavimo tute le nostre canzoni a sbrega timpani.

Quela che la me piaseva sempre più de tuti la jera quela che la scominzia : "Oh Fiume Tu sei la più bella". Ve ricordé le parole ?

" Oh Fiume Tu sei la più bella, Oh Fiume Tu sei la più forte" e la finisse con "Se vuoi saper, son nato nel Carnaro. Sono fiuman, sono italian !"

Arivadi a L' Aquila me pareva de esser arivadi in un altro mondo. I ne ga trasportadi con la coriera in un strada piena de polvere, che la andava suso, tutta a bissa, fino a sta Colonia, bela, grande, nova, apena fata, che la jera proprio davanti de una grande pineta, vizin del vilagio de Roio. Quela volta mi non savevo che el nostro Comandante D'Annunzio el gaveva scrito de sto Roio d' Abruzo (lui el jera abruzese) indove che el suo Aligi el pascolava le cavre. El posto alora el jera belissimo.

Per noi che vegnivimo de Fiume, indove che sula nostra montagna xe solo gromaze e graje, ma boschi pochi, sti grandi boschi de pini  abeti  ste grandi montagne le jera roba de storie de fate.

La zente la jera però un poco indrìo cole carte.

Penseve che sul campanil de la cesa de Roio le campane no le gaveva el batocio e i le sonava dandoghe un colpo con un martel de fero.

 

Mi go ancora in tei oci sto mato, suso sul campanil, che con sto grando martel el pesta su sta campana.

De magnar i ne dava ogni ben de Dio. Giusto dopo diezi ani, nel 1948, a Brindisi, al collegio Tommaseo, inveze,  dieta dimagrante a base de minestra de ceci co l' acqua.

De matina café, col late fresco coi paneti, butiro e conserva de armelini. Per zena slepe cussì de tono soto ojo, ma non de quel giaponese, come ogi, col mercurio.

De dopopranzo, quando che andavimo - sempre acompagnadi dala vigilatrice - a giogarse in pineta, pasavimo de una portisela e da una parte jera una baba cola traversa in terlis blu, con una granda zesta de tochi de pan e da la altra parte una altra baba con una zesta piena de graspi de uva e de tochi de ciocolata. Jerimo fora tuto el giorno a far caminade suso per i monti, opur in pineta.

Quela volta jera la guera in Spagna e noi - muleti pici - non sapevimo gnente ne' de Guernica, ne' del Alcazar, ne' del Hemingway che el gá poi scrito el libro "Per chi suona la campana" del qual i ga dopo fato quela bela pelicola indove che xe el Gari Cuper cola Ingrid Bergmann. Alora i ne insegnava tute ste canzonete dela Spagna milenovezentrentaoto (vista da destra) che noi cantavimo come mati tuto el giorno.

Ve ricosdè ? "Cala el sol cola camisa nueva ... " e dopo "Brilla una stella in cielo, madrilenita ..." e quela "Suona chitarra spagnola ..."

Un' altra roba, ma assai assai bela che mi me ricordo: de sera, quando che el sol el tramontava de drio del Gran Sasso, granda adunata in piazal davanti de la colonia per el " amaina bandiera".

Mi giá quela volta - come che ve disevo, mi gavevo nove ani - mi ero assai romantico, e ogni volta me veniva una lagrima quando che sto sol el spariva dietro la montagna e un muleto, in montura de marinareto, el sonava la tromba, e un altro muleto, anche lui vestido de marinareto, el lezeva con una voze dramatica tipo Alberto Lupo "La Preghiera del Marinaio": "A te, o grande eterno Iddio, Signore del Cielo e dell' Abisso. Noi, uomini di mare e di guerra, da questa sacra nave, armata dalla Patria, leviamo i cuori ... (e dopo la finiva) ... Benedici nella Tua fede, o grande Iddio, la nostra Nazione  (dopo vegniva Mussolini e el Re). Benedici nella cadente notte le case lontane, le care genti. Benedici il riposo del popolo. Benedici noi che per esso vigiliamo in armi sul mare. Benedici.

 

Roio del Sangro. Wikipedia

Un dopopranzo xe vegnudo suso in colonia un furgon con quei del ' E.I.A.R. e i ga registrado - per farghe apunto un poco de reclame a sta nova colonia del fasismo - una trasmision dove che apunto cantavimo ste canzonete dela Spagna che gavevimo imparado. Mi me ricordo de una picia - anche essa ospite dela Colonia - la gaveva mandado saluti ala mama che la lavorava de stiratrice sul transatlantico "Rex" in navigazion per la America.

Gavé visto el film de Felini "Amarcord", indove che se vedi el Rex ? Tuto de pianzer !

Dopo un mese son tornado a casa, a Fiume, nero del sol e sgnonfo come un balon, che la mia mama in stazion gnanca la me conosseva più, e mi che pianzevo come una fontana.

Scolté muli, per combinazion, jera anca qualchedun de voi in tela Colonia de Roio sul Gran Sasso d' Italia ? Me acorzo che ogi  non ve go contado niente dela Germania Ovest. Sará per la prossima volta.

 

Saltimbanchi,  fachiri  e  sonadori

Come che ve contavo, in tela Germania Ovest xe tuto come in America !  Supermarket, tuto automatico, eletronico, e la gente no la gá tempo gnanca de dirte bongiorno. Xe solo una roba che a mi la me piase assai e che grazie a Dio ancora la esiste, e anzi la scomincia de novo.

Xe quei che mi li ciamo "i saltimbanchi".

De un pochi de anni, in tele  zitá grandi e picie, sempre qua in tela Germania Ovest, i ga fato in zentro tuto "zone pedonali" indove che meno mal uno pol caminar cola paciada, senza dover far el saltamartin per non andar soto l' auto.

In ste zone dei pedoni xe tuta una "fioritura" de arti e mestieri che te par de esser tornado in tel MedioEvo, indove che tuta la vita de una zitá la jera per strada. Xe de novo, come una volta, bancheti indove che i vende fruti, verdure, struze de pan, aghi de sicureza e aghi de pomolo, una miscela patentada per cavar le mace de smir, un temperin col cavatapi - apriscatole - tajavetro - cazavide - tenaia.

Ma quel che mi - come che ve disevo - me entusiasma, xe i "saltimbanchi". Apunto per strada, o quando che piove, soto le stoje dei negozi o in tele entrate dei Supermarket, xe tuta una saja de sonadori, cantanti, fachiri, pitori, che te par de esser in tela Piaza Granda de Marakess, che la xe apunto famosa per sti spetacoli a l' aperto. Come l' Arena de Verona.

Più bel de tuto xe sabato matina, quando che se va in zentro a far la spesa, e xe tuto pien batudo de gente. L' altro giorno go visto una clapa de negri del Congo, vestidi cole straze colorade che i porta in Africa, che i bateva sui tamburi de pele, grandi e pici, cola bareta per tera per ingrumar i schei.

Un poco più avanti i jera i mati dela Bolivia (o forsi i jera del Perù) che i sufiava in tei piferi de cana de bambù, che qua i li ciama "el flauto de Pan", e intanto i mati cole flicche che la gente ghe buta, i se compra pan e mortadela.

Indove che se va zo per le scale in tel tram soteraneo - in Italia e in Francia i lo ciama "Metrò". qua se ciama "U-Bahn" - jera due mulete, bionde e palide, coi cavei lunghi che - acompagnade de l' orchestra dei Filarmonici de Viena, direti da Von Karaian (incisa sul registrador con dò altoparlanti) le sonava assai ben sul flauto trasversal - quel tuto lustro che se sufia de una parte - musica de Vivaldi e Bocherini. Le xe studentesse del Conservatorio de Musica che le se guadagna i schei per comprarse, mi credo, un vestito, perché ti te le vedi sempre solo cola maietta e i blu gins.

Lá vizin jera anche el mato che slucava da una boza un quarto de litro de spirito de brusar, e dopo lo spuda fora e lo impiza con un fulminante, che una volta i lo ciamava "magnafogo".

In tela "Hauptwake" che xe la piaza in zentro de Francoforte, jera uno cola testa ala Yul Briner - che Dio ghe brazi l' anima - che a torso nudo - carigo de tatuagi - el se rodolava per tera sui vetri de una boza spacada.

Piazza della Cattedrale di Francoforte

 Mi li ciamo tuti "saltinbanchi" perchè me par tuto una missianza de una zitá del medioevo e una pelicola del Federico Felini, che a lui ghe ga sempre piasudo mostrar ste robe.E xe assai più bel guardar ste robe per strada, che non in Teatro o in Circo.

A mi me par de esser tornado, apunto, in tel medioevo, indove che per strada - come che jera sempre in tele pelicole de "Capa e Spada", che adesso no se usa più, ma che una volta le fazeva furor - un mato sui scalini de un androna in zitavecia el fazeva fora, col fioreto, un sete o oto guardie del Cardinal Riscelié.

E che per andar a darghe un baseto ala sua bela inamorata el se rampigava su per el muro dela tore, che a mi me vegniva sempre sudori fredi, e dopo go visto che jera tuto un truco e che i mteva in studio, a Holivud, el muro per tera, e el mato el fazeva finta de rampigarse.

A proposito de pelicole, ve ricordé che una volta, soto Mussolini - sicome che el Emilio Salgari, scritor italianissimo, morto in miseria, el era molto "in auge" col Regime - alora i gaveva fato tuta una serie de film de Sandokan: I misteri della Jungla nera, I pirati dela Malesia, La tigre di Monpracen, ecc. Sicome che i atori disponibili i jera sempre quei, alora una volta, in una de ste pelicole, i ga vestido el povero Camilo Piloto - che quela volta el jera più largo che lungo - de Sandokan (o el jera Tremal Naik ?) e a sto disgraziado ghe tocava apunto rampigarse suso per una liana per scampar ai "thugs", che ghe coreva drio col cortel "kriss" in boca, el jera restado impicado su sta liana che mi, in zinema Odeon, me ricordo che me jera vegnudo così de rider, che me fazeva mal la panza perchè me jera vegnudo in amente quando che mi restavo impicado a meza aria sule Pertiche in Palestra in Piaza Cambieri, senza eser bon de andar ne' su, ne' zo.

 

Tornemo ai Saltimbanchi.

A Fiume, per strada, ve vericordé che davanti de la Ciesa dei Greghi in via Machiavelli, jera quela volta un omo col "Diavoleto de Cartesio", che noi muli stavimo a guardarlo con la boca averta ? El gaveva un tubo de vetro co l' acqua su una crozola de legno e drento un diavoleto de zera che el andava su e zo, come lui ghe ordinava.

 

La Maria mata, cola petinatura ala "garsonne", la fazeva sempre i sui concerti de armonica, cuciada sul scamini del palazzo Adria, visavì del Gratoni, quel dele coriere.

Chi xe che no' l se ricorda del Luna-Parck in Scojeto, col ringespil cole carozete che le svolava per aria sui dischi de Angelo Cecchelin, cola sua voze de fil de fero rusine, de triesti, che el ghe domandava ai spetatori perchè quela volta in Italia la Miseria la comanda de più del principe ereditario ? Perchè el Principe, quela volta, jera solo Colonelo, e la Miseria la jera ... Generale.

 

Ogni tanto quando che el dizeva una tropo grossa sul Regime, i questurini i lo spetava drio del palcoscenico e i lo portava drito in canon in via Roma.

Come quela volta che el xe vegnudo fora in Teatro Fenice e el ga deto che per star mejo in Italia, bisognava scanzelar tre feste, Pasqua, Nadal e Feragosto, e su una tabela el ga scrito col gesso P.N.F., che quela volta voleva dir Partito Nazionale Fasista.

Tornemo in Scojeto. Jera anche quel chiosco tondo indove che se butava sule boze i cerci de legno e se vinzeva i pessetti rossi.

Una volta mi gavevo vinto un bel pessetto rosso che a casa, dopo tre giorni, el galegiava in tela boza de vetro, orizontal come un sugharo. Ghe davo de magnar molena de pan, che dopo i me gaveva deto che ghe fazeva mal, e dopo ghe gavevimo fato el funeral zo per el cesso, che mi pianzevo come se fussi morto un parente.

Gavevimo anca un bel canarin che 'l se ciamava Bastian, e che 'l cantava come un mato. Che bel che 'l cantava !

Animali domestici non mancava, sopratutto i sorsi che da noi ghe stropavimo i busi indove che i veniva fora, col gesso de presa, ma poi el gesso i lo rosigava.

Alora el nostro sub inquilino, el Dionigi - che el jera furlan e el lavorava de Capo Magazinier in tela botega de pitor del Amato Fumi in via Carduci, proprio visavì dela Provincia -  el ne gaveva insegnado che, inveze de gesso  de presa, bisognava stopparghe sti busi col zimento, misiado con tochetini de vetro e i sorsi no i jera più boni de vegnir fora del buso.

A proposito de quando che mi jero picio, la mia mama la gaveva un modo de dir, quando che la fazevo rabiar. La me zigava - se vede che la gaveva leto el "Orlando furioso" - "Malignaso mulo, ti ti me "tiri a cimento". Mi, pisdrul che jero, non go mai capìdo perxché la mia mama la me diseva che  ghe tiro el zimento, che lo adoperavimo solo per stroparghe i busi dei sorsi!

 

Altre bestie, per noi squasi domestiche, jera tute le gus'cerizze dei mureti dele case in via Cellini - per andar dala via Giotto in Casa Balilla - che quando al sol in Primavera el scaldava sti mureti, le jera tute lá a ciapar el sol, pronte a far un "sprint" se qualchedun ghe andava tropo vizin. Quanti ricordi.

Come che ve go sempre deto, mi scrivo ste roba cola speranza che i Fiumani de Sydney, Toronto, Chicago, Rapallo e San Pietro Vernotico lezendoli, i se ricordi de la nostra Zitá, che noi volemo che la se ciami sempre Fiume, e chissá che un giorno non la se ciami de novo cussì.

 

5^  PUNTATA

Continuano  le ciacolade dalla MittelEuropa

1945. Fiume non è più italiana

Zitá  che  cambia  nome

Veramente non xe che go robe assai interessanti de scriver, ma a mi me dispiaseria de interomper ste ciacolade con voi, che me par de vederve a casa che le legé, indove che zerchemo tuti d tegnir viva la memoria e el nome dela nostra Fiume.

Se volemo dir la veritá, in tel mondo xe tante le zitá che le "sparissi", vojo dir che le ga combiado paron e nome, per un motivo o per l' altro. I nostri fioi no' i sa che una volta esisteva zitá famose, come Batavia (Djacarta), Saigon (zitá de Ho Ci Min), Pietroburgo (Leningrado), Costantinopoli (Istambul) e Smirne (Izmir). A Fiume jera famosi i fighi suti de Smirne.

Pechino ogi i la ciama Bei jing e chisá come che i se ciamará i cani pechinesi (beijnghesi) ?

E dopo xe tute le altre zitá in te l' Africa, che mi go perso el conto - mi non ero mai bravo in geografia su l' Africa - e che adeso le ga tuti sti nomi africani che non se pol pronunziar.

Bisogna dir che tuti sti loghi i jera colonie dei Stati europei - I grandi Stati coloniali de una  volta: Inglitera, Francia, Spagna, Olanda, Portogallo, e che la zente che abita lá i ghe ga dado un nome in tela lingua de lori, adesso che i xe indipendenti. Indipendenti per modo de dir perché, se no i xe coi americani,  i xe coi russi o coi cinesi.

Xe solo qua, in tela nostra vecia (vecia ma bona) Europa) che - come che ve go giá scrito una volta - i ga spartido ste tere senza un criterio logico, e alora i governi slavo - balcanici - comunisti i se ga sfogado a scanzelar i nomi de sempre (ripeto de sempre) e i ga fabricado nomi de fantasia.

La nostra zitá Fiume la xe stada una de ste zitá "fantasma".

In Boemia, la zitá indove che la xe nata mia molje - che mi ghe digo sempre, ti ti son la "Boheme", che la jera sempre anca soto l' Austria, "Aussig", ogi la se ciama "Usti" e tuti i nomi ilustri - e anca ste robe ve le go giá dete - ogi no i esisti più Abbazia, Carlsbad, Marienbad.

Come se la guera la gavessi non solo distruto case e palazi, ma anche i nomi, scanzelandoli cola scolorina, ma scolorina politica.

El bel o el bruto xe che inveze de meterse d' acordo per non far più mazamenti e guere, le Nazioni le vol sempre comandar, ogniduna per conto suo, sempre zapandoghe i pié ai altri.

El colonelo Ghedafi, che el xe el capataz dela Republica Popolare de Jamahirija - che se ciamava una volta Libia "Tripoli, bel suol d' amore", ghe vol farghe guera a tuti. I Egiziani, carighi de mefa, i ga messo le divisioni corazzate al confin, me par come quando Mussolini el gaveva messo le divisioni al Brennero, inglesi e argentini i xe patufa ancora ogi per quele quatro grote in meso al mar, squasi al Polo Sud, che se ciama Isole Falkland (pardon Malvine). Tuto sempre col moto: "noi semo i più bravi e i più furbi, tuti i altri i xe m..a".

A proposito de sta parola de quatro letere, devé saver che qua in tela Germania Ovest per Nadal i fa in tute le zitá el "Christkindlmarkt", che vol dir el mercato de Gesù Bambin.

Veramente quel original jera una volta solo a Norimberga, ma savé come che xe, dopo tuti i ga voludo gaver anca lori sta roba e adesso i la fa apunto dapertuto.

 

Christkindlmarkt a Norimberga

I pomi qua i vien dala Nuova Zelanda e i persighi dal Maroco. Tornando al Mercato del Nadal, xe tuto assai bel, e se trova de tuto su sti bancheti, pupoloti, pignate, zeramiche e porzelane de tuti i tipi, robe de impicar su l' albero de Nadal e, logico, tante robe de magnar, luganighe de tute le lungheze, forma e color, pomi candidi sul steco, bomboni, ciocolata e tuto ga un bon odor de mandorle rostide, de vin brulé, de zucaro de orzo e de popcorn.

Qua in tela Germania Ovest, che semo coi americani, se magna popcorn a tute le ore, e lá nela Germania Est, che i xe soto i russi, i magna pas'cipe (semi de zuca).

Alora domenica se semo calumadi a Francoforte a guardar sto mercato. Una roba che mi la me piasi assai xe che ale cinque de dopopranzo, quando xe giá scuro, suso sul cornison (xe una picola teraza) dela ciesa de Santa Catarina, che la xe su sta piaza, indove che i fa el mercato, xe ogni giorno cinque o sei de lori che i sufia sule trombe e i sona assai ben musica de Nadal clasica-baroca, de Back, Corelli, Vivaldi e Telemann. Alora

Come che una volta i fighi freschi se li magnava solo in estate e le naranze solo per Nadal, ogi se pol comprar le fragole fresche del Sudafrica in genaio e i finoci (quei che se magna) in agosto.

go visto un bancheto indove che i vendeva scudele de ceramica fate a man in una picia fabrica, tute bele scudele con pupoli in rilievo, e su ogni scudela jera piturado, anche in rilievo e in blu scuro, un nome de mas'cio o de femina. Tute pulito, impicade su una siza, in ordine alfabetico, perchè la Germania la xe sempre un Paese ordinato, scominziando de Adelheid, o Adalbert, fino a Walther, Wilhelm e Waltraud.

Mi go comprado una scudeleta per la mia molje, con suso scrito "Karin" e una per i fioi, con susp "Marco" e "Christina". Veramente la mia fia la se ciama "Cristina" senza la acca, ma qua xe cussì.

 

Sicoome che volevo anche farghe un regalin al mio amico Rico, triestin patoco, che el xe anche lui de venti anni in Germania, alora go trovado una bela scudela con suso in rilievo un nome de dona che se usa in Inghiltera e in America, e anca qua che el scominzia con la M e el finissi cola A. Un nome de quatro letere apunto. Figureve come el sará contento el Rico, de bever de matina el café in sta scudela.

Parlando de scudele, in casa nostra a Fiume le scudele indove che bevevimo café col late no le gaveva manighi. Iera quele bele tonde, grande - che le pareva picole terine - che de inverno se se scaldava le mani, indove che inzombavimo anca tochi de pan.

Ala mia mama bonanima ghe piaseva anca far le sope coi tochi de pan in tel vin nero, che jera una roba che se usava da noi. Iera quela volta anca assai distinto tociar i biscotini "Oswego" in tel bicerin de Malaga o de Marsala.

Mi me ricordo che  mi metevo sempre tochi de pan in tela pasta e fasoi e in tel minestron de risi e patate o de orzo e fasoi. E quando che gavevimo per pranzo o per zena gulas, alora i piati non ocoreva lavarli perché mi li netavo bei lustri col pan. Quante robe che se fazeva col pan, Panada, Landize.

La mia moje la mete ancora la molena de pan smojada in tele polpete, non per sparagnar - come che se fazeva una volta - ma perchè la dixi, come che se usa in Boemia, che le polpete le vien più tenere.

Me racomando muli, non ste far mace sula tovaja quando che inzombé el pan in tel vin nero. Se no la molje la se rabia.

	Bagno ex Quarnero a Fiume

I  bagni  de  Fiume

Prima de tuto devo e vojo dirghe un forte "grazie" ! ala mula, e ghe dario anche un baseto se 'l suo marito no' l xe geloso - che la ga subito scrito apena che ghe la ga leto la mia storia sula Colonia Montana de Roio dei Abruzi. Xe assai bel saver che non semo rimasti soli al mondo, ma che xe ancora qualchedun che ga visto e vissudo le robe che gavemo visto e vissudo noi. Per mi la xe una roba che la me fa ben qua drento, in tel stomigo.

Parlando dela montagna, sto inverno 1985 - 1986, qua in tela Germania Ovest non xe che gavemo avudo assai neve. In ogni modo, a due ore e mesa de auto, de qua dove che abito mi, se ariva in tela Schwarzwald, che saria la famosa Foresta Nera.

Non steme a domandar perché la se ciama cussì, perché mi non so. Lá, ghe xe sempre, de inverno, un per de metri de neve e de sabato e domenica con el mio fio Marco andemo a far un poco de sci de "fondo", che xe assai più sicuro e xe meno pericolo de romperse i ossi, che non butarse zo per la pista. Discesa coi sci mi la fazevo quando che jero un poco più giovane e jero socio del Ski Club Seegrube a Innsbruck in tel Tirolo del Nord (Austria) perché il Tirolo del Sud (Südtirol, alias Alto Adige) el xe in Italia, ma i parla lo steso per tedesco.

 

 

Panorama di Innsbruck

Tornando ale ativitá sportive - come che ve dixevo - qua in sto paese americanizado, xe tuto moderno, assai ben organizado e anca de inverno, presempio se pol nudar in tele piscine coperte co' la aqua bela calda eco' l profumo intenso de cloro per copar i microbi, vermi e bacoli.

Mi credo però, e tuti voi son sicuro che me daré ragion, che in nissuna parte del mondo jera cussì bel nudar, come da noi a Fiume.

De picio mi gavevo imparado a nudar in tel bagno Netuno, indove che non jera spiagia, ma dala riva jera subito aqua alta, alta per mi che jero pisdrul. Se ve ricordé el "Netuno" el jera tacado del silurificio "Whitehead" che guardavimo sempre quando che i fazeva i tiri de prova coi siluri (svodi), che dopo i li andava cior col motoscafo perché i costava un fotìo de bori.

Dopo i gaveva serado el bagno Netuno e i gaveva fato, me par, un Hangar, o una roba cussì.

Nel periodo del "Purgatorio" 1945 /46, tra l' arivo dei druzi a Fiume e l' esodo finale in Campo Profughi - quando che, come dizevo, vivevimo "ala giornata" con el moto "non-so-quel-che-suzede-doman" - noi muli andavimo a balar cole mule apunto lá indove che una volta jera sto Bagno, che i gaveva fato una specie de Dopolavoro del Silurificio.

Sonava una orchestrina che se ciamava qualcossa col "Boogie - Woogie" che el jera in voga, indove che el mio amico Renato Bulian, che el xe morto, povero, due ani fa, a Santiago del Cile, el sonava el piano, el mulo Ossoinack el contrabasso, un mulo coi ociai, non me ricordo come che'l se ciamava e el veniva con mi ale Tecniche - el sonava el violin, e el Sergio Pizzulin la chitara.

 

El Sergio, come che gaveré leto, el xe sempre, ancora ogi, sula cresta de l' onda in Svizera, Cantautore e Musicista "de grido". I altri locai indove i muli sonava quela volta - e mi jero sempre con lori - jera la sala dei Poligrafici, in Vial vizin ai Capuzini in Sabiza in primo pian, e in Giardin Publico (Mlaca) indove che i drusi i gaveva anca fato una Balera.

Tornando ai Bagni, in tel Bagno Quarnero, in Molo Lungo, giá quela volta noi a Fiume jerimo sempre a l' avanguardia. Mi veramente jero Capo Centuria dei Balilla Moschetieri, e proprio ieri, ciacolando al telefono col Marino Calochira, el me ricordava che lui e mi gavevimo fato insieme el corso per Caposquadra in Casa Balilla.

Dunque disevo, che el "Quarnero" giá quela volta el gaveva un toco de teraza, suso, riservado - vietato l' ingresso ai non addetti - per el "bagno integrale" indove che le signore de buona familia le ciapava el sol come che Dio le gaveva fate.

Da noi in tela Germania Ovest i ghe ciama FKK (Freie Korper Kultur) che vol dir Cultura del Corpo Libero, cioè senza mudande . Mi me ricordo che i Comandanti dei vapori dela "Fiumana di Navigazione" dopo che i gaveva molado le zime del Molo San Marco o del Molo Scovazza, pasando davanti de sto bagno Quarnero, sul ponte de comando, i se tacava sempre el canocial sui oci, e inveze de guardar che la nave la andassi drita, i cucava le babe distirade sula teraza del Quarnero.

A Cantrida, dopo del Cantier, jera el Bagno Riviera e el Bagno Savoia. Ve ricordé che durante la Republica Sociale Italiana di Salò, quando che noi a Fiume jerimo diventadi "Adriatisches Küstenland" (Litorale Adriatico) soto el protetorato del Terzo Reich, quando che el Wusche, detto "el Porco", paron del famoso ristorante omonimo ai Pioppi, el jera diventado vice-Gauleiter ?

Quela volta, dopo che el Vitorio Emanuele Terzo el jera scampado cola nave verso Brindisi lasando in braghe de tela tuti i poveri soldai italiani e nel frfatempo el Colonelo Skorzeny (gnoco de Germania) el jera andado col picio aroplan "Stork" (che vol dir "Cicogna") a cior Mussolini sul Gran Sasso ?

Bon, alora, sicome che i Savoia i jera proibidi perchè jerimo apunto in Republica ...

A proposito de Republica ... quando che mi andavo a scola, ale Tecniche in Piazza Cambieri, el profesor, quando che fazevimo tropo gheto in clase el ne zigava "ma cossa xe sta republica" ! Indove che, evidentemente, la parola republica "res publica" la jera sinonimo de remitur, confusion, disordine, caos.

Vado avanti, se no perdo el filo. Alora quela volta che sti Savoia i jera, come disevimo "fori lege", per sparagnar i bori i gaveva cavado la granda letera maiuscola "I" de sopra dela entrata del bagno Savoia e i ghe gaveva fato far una grande "N" che el nome el jera diventado "SAVONA", che el jera neutral e nissun  podeva dirghe gnente.

Se ve ricordé, i gaveva tirado zò tute le grandi "R" maiuscole (col punto) come presempio in Riva indove che jera sul teto "R. Idroscalo"  che voleva apunto dir "Regio".

Mi porto ancora ogi el ricordo del Bagno Savoia (o Riviera) indove che una volta gavevo fato oduf soto el zaterin tondo de legno che el jera ancorado sul fondo con una cadena tuta rusine e piena de pedoci e me jero fato su sta cadena un sbrego sula gamba destra che se vede ancora ogi indove che i me gaveva cusido.

Quando che non gavevimo schei per pagar la entrata del bagno andavimo i Baia del Amor, e lá mi me ricordo, con la britola gratavimo le pantalene via dele grote che la mia mama bonanima la fazeva co ste pantalene un risoto assai bon, co l' ajo, petersemolo e ojo de oliva de quel bon, dalmato.

Adio muli, vojo dir arivederci, e me racomando in tel risoto de pantalene e de scampi meté sempre ajo, petersemolo e ojo de oliva, de quel bon.

1986.

 

Abitudini  alimentari  fiumane

Proprio ieri mi pensavo che xe assai interessante leger sula "Voce di Fiume" in tela ultima pagina (e anche in tela penultima) i nomi de quei che manda schei per tenir in piè sto nostro giornal che el xe quel che ne tien in contato.

Mi guardavo da quanti Paesi del mondo che ariva sti bori, e in quanti Paesi e Continenti i se ga sistemado sti fiumani, dopo che i ne ga scaziado dala nostra Zitá. Pensavo apunto che forsi poderia esser interessante far un picio atlante geografico, una curta lista o elenco a tempo perso, de tuti sti loghi indove che ogi, nel milenovezentootantasei, vive un fiuman.

Son sicuro che la redazion dela "Voce" ormai dopo tanti anni la poderia aiutarme a far sta lista, ripeto breve, de tuti i Stati del Mondo de dove un fiuman el se ga fato vivo in sti ultimi venti ani. Mi go trovado fiumani in tanti Paesi.

In tel milenovezentosessanta jero cola nave a Auckland (che se leze O' kland) in Nuova Zelanda, e el piroscafo el jera el "Fair Sea" dela Sitmar.

 

Piroscafo "Fair Sea" della Societá Sitmar

Alora in sta Auckland jera vegnuda a bordo una signora novozelandese che parlava per talian e la diseva che la gaveva sentido che sula nave el jera un ufizial che el jera de Fiume. alora mi son andado da sta signora e ghe go deto che mi son el Giulio Scala e che sì, che mi son fiuman. Alora essa la ga scominziado a pianzer e la me ga domandado se mi jero el Giiulieto, el fio dela Piera levatrice, e mi ghe go deto che sì, che mi son el Giulieto.

Bon, savé chi la jera ? Jera la mula Perillo, che i sui se ga sistemado in Nuova Zelanda indove i ga diverse grandi fabriche de scarpe "Perillo Shoes" che i esporta dapertuto.

 

I Perillo i abitava a Fiume in tela cosideta "Casa Rossa" de Cosala, che la jera in zima a quela riveta a serpentina che la costegiava el vecio zimiterio e mi li conosso tuti assai ben perchè la mia mama, che la jera apunto levatrice, mi credo che la ga "levado" tuti i nove i fioi dela signora Perillo e mi jero diventado quasi un de familia.

Ognidun de noi el se ga abituado a sti Paesi foresti, a sta lingua foresta. Sul numero de febraio dela "Voce" xe un bel articolo del Claudio Antonelli del Canada, che el scrive apunto dei emigranti e de come che i se trova in sti Paesi strani.

La Granda Diaspora, dopo la seconda guera mondial, la ga sbatudo omini e familie in tanti Paesi indove che la vita la va avanti e i fioi dei fioi i se portará drio, per generazioni e generazioni i nomi de Superina, Capudi, Scrobogna, Rusich, Grubesich, Lipizer, Host, Varglien, Lenaz, Prodam. ecc.

 

Poco tempo fa go ricevudo una bellissima e assai lunga lettera dela signora Padovani che la abita a New Jersey in America, e esa la me ga zigado perché non go mai scritto, sula "VOCE" el mio indirizzo, e se el xe segreto e riservato.  Me dispiase e vojo dir che el mio indirizzo nol xe assolutamente segreto, e ve garantisso che mi ghe rispondo a tuti quei che me scrive e che me fa assai piazer de ricever posta dai fiumani, specialmente de quei de "oltremare".

Sempre in quel bel articolo che ga scrito el Antonelli de Montreal, el dise anca - parlando sempre dei emigranti italiani in Canada: "Le abitudini alimentari hanno subìto uno scossone, ma hanno subito trionfato su tutta la linea, a causa della loro indiscussa superioritá."

Mi che son - come che me diseva la mia mama bonanima, lento de comprendonio - non go capido assai ben cossa che 'l voleva dir, ma credo che' l dise che le "abitudini alimentari" nostre le xe assai mejo (o che xe mejo quele estere ?). In ogni modo, anca per mi che vivo da tanti ani a l'  estero in Germania Ovest, le "abitudini alimentari dela mia familia  le xe come le jera da noi a Fiume, assai miste, italiane, ungaresi, austriache, ecc.

Per quanto riguarda l' Italia, se almeno una volta la setimana non se magna spagheti, i fioi rugna . Gulas fazemo spesso, con le patate. E ogni tanto Gulas de Szegedin, con drento capuzi garbi.

Austria: la mia molje (bohema) la fa, come che la fazeva la mia Mama i "Schinkenfleckern" pasta fresca larga fata in casa, o tagliatele comprade in negozio, dol butiro fresco e persuto coto tajado a tochetini. E se volé, de sora formagio gratado.

La "vera cusina fiumana la xe sempre presente a casa mia, presempio cola pasta e fasoi cole cotighe e cole costolete de porco fumigade (maron scuro).

E qua me permeto de ricordar che da noi a Fiume le più meje costolete fumigade se le comprava a "l' Estero", cioè in un picio negozieto a Sussak, sul Lungo-fiume ("on the Riverside" per i fiumani USA/Canada).

Me racomando muli, non ste perder voi, i vostri fioi e i fioi dei fioi, la nostra tradizion imortal dela pasta e fasoi.

 

Fasoi cole cotighe

Se non trové i fasoi suti ve mando mi un pachetin de la Germania Ovest. E in caso de "emergenza"  se Dioneguardi non gavé a man né crodighe né costolete - alora poté cusinar drento anca luganighe - ma che sia de Cragno, me racomando.

El dialeto fiuman

Ogi mi vojo ciacolar del nostro dialeto. Mi son sempre de l' opinion ch el dialeto el xe una vera e propria madrelingua de un particolar grupo de gente, che bisogna salvarlo e tegnirlo vivo nel tempo perché el fa parte del patrimonio vivo cultural e tradizional de sta gente.

Purtropo anche i dialeti "classici" i sparisse, anche se in tele zitá con grandi tradizioni popolari letterarie e storiche - come presempio Venezia, Napoli, Genova, Roma, indove che esiste apunto una leteratura, un teatro, una musica in dialeto original - non sará cussì fazile che tuto sparisse , anche se i muli ogi pian pian i parla sempre de più in lingua.

Anca per quel che riguarda el nostro dialeto fiuman, el dialeto el resta original e autentico proprio fora de l' Italia, indove che i muli i parla inglese o altra lingua foresta, a in casa, cola Mama e col pare i parla apunto el nostro bel vero inconfondibile fiuman.

Mi penso che suzederá come quando, nel 1943 xe sbarcadi i Americani in Sizilia e i soldati americani, fioi e nipoti de emigranti italiani "oriundi" dela seconda o terza generazion, i saveva parlar solo american e puro e vecio dialeto de Trapani o de Milazzo.

 

Accoglienza dialettale ai figli dei compaesani

I fioi e nipoti dei fiumani "Canguri" de Sidney, Melbourne e Wooloolong , quando che i vegnirá in ferie in Italia, nel 2024, sará forse i unici che i saverá ancora parlar in fiuman s'ceto.

Presempio, qua in tela Germania Ovest, a Tübingen, che la xe insieme a Padova, Bologna, Heidelberg, una dele Universitá più vece de tuta l' Europa, fondada nel 1477, vive el professor Werther Schneider, nato a Fiume, che el jera vegnudo via de Fiume cola sua familia, prima ancora dela guera. El profesor Schneider el dirige, nela Universitá de Tübingen un "team" de dotori per la ricerca sule malatie del sangue, che el xe un dei mejo del Mondo.

Bon, lui, ch' el xe un zinquanta anni qua in tela Germania el parla un dialeto fiuman cussì autentico e classico. El dise presempio: "Essa la gaveva" e quel essa contraddistingue el nostro dialeto fiuman da tuti i altri dialeti veneti dei quali el nostro dialeto fa parte.

Quando che mi parlo col prof Schneider quasi me vergogno perché mi - pur essendo fiuman "vero" nato a Fiume da genitori tuti due anca lori nati a Fiume - mi go problemi col nostro dialeto

 

Universitá di Tubingen	Hegel

El mio fiuman el xe imbastardido sopratuto col triestin, col veneto, col trentin, tuti loghi indove che mi go visudo nei ultimi quaranta anni. Me vien de rider, presempio, quando che parlo per telefono col Mirko Pironti, che el abita anca lui qua vizin de Colonia, perché lui el parla un fiuman cadorin, belunese, perché la molje la xe apunto de Belluno e se vede che in tanti ani essa la lo ga "annesso".

Ve devo proprio confessar - per esser onesto come sempre - che de due o tre anni che mi scrivo ste Ciacolade, più de una volta me toca andar a guardar come se scrive una parola in tel Dizionario del Dialeto fiumano del Professor. Samani (lo gavé anche voi ?).

 

UNRRA,  no  UNPA

Qualchedun de sicuro el se domandará de indove che vien fora tute ste storie, che un el scrive e che dopo se leze sui giornai, che poi i ghe ariva ai fiumani in tuto el mondo. Ognidun de noi el ga un magazin, un deposito de ricordi, de memorie dele cose che le xe successe, Robe che magari, quando che un le scrive, alora anca i altri i dixe: sì, ecco che adesso mi me ricordo che anca mi go fato ste robe a Fiume, che anca mi jero lá quela volta a Fiume, quando che el mondo el jera ancora tuto de un toco e no 'l jera diventado mato come ogi, indove che i omini i se copa tra de lori pegio che in guera e pegio che nela etá dela preistoria, quando che per un toco de pan o un toco de carne de dinosauro i te conzava un manganel sula glava, che te imatuniva per sempre.

Mi son proprio convinto che el mondo, co' l progresso tecnico el xe diventado tropo complicado.

Ga inscominciado tuto coi pachi de l'UNRRA, da non confonderse cola UNPA.

Chi de voi se ricorda de l' UNPA  ? Voleva dir Unione Nazionale per la Protezione Antiaerea.

A Fiume, nel 1944, quando che mi jero nela Milizia Portuaria, gavevimo la Caserma in quela corte indove che una volta - se non me sbaljo - jera i Pompieri de Fiume, squasi visavì le scalete che se andava zò in corso pasando per quela caliseta indove che 'l jera el Ristorrante "Conca d' Oro".

I muli dela UNPA, che i gaveva un terlis grigio col sul brazo una fassa con su sctito U.N.P.A. i gaveva un furgonzin triziclo con tre rode, e i andava a butar in mar, in Mololungo, le bombe inesplose che i tirava fora dai busi e che in italian se ciama "crateri" dele bombe.

 

 

Iera un lavoreto un poco pericoloso perché, se una de ste dombe la sc'iopava, saltava in aria careto e muli. Saria asai bel se qualchedun che el jera del' UNPA a Fiume nel 1944 - 45 se fazessi vivo. [Noi eravamo dell' UNPA a Fiume, dal gennaio 1945, ma solo come informatori. Avevamo il permesso di uscire di notte, durante il coprifuoco e di giorno durante gli allarmi aerei. N.d.R.].

A proposito de protezion antiaerea e controaerea - che xe quela che sbarava sui aroplani del nemico - in porto a Fiume i jera atracade le "motozatere" dei tedeschi, che i gaveva la "Flack" con le mitralie con quatro canne, che quando che arivava i inglesi o i americani i sbarava come mati. [A nostra conoscenza le mitragliere a quattro canne della "Flack" in porto - non in molo lungo - erano fatte funzionare da soldati ucraini. N.d.R.].

In Mololungo jera la contraerea italiana, che jera tuti muli de Fiume e dintorni. Ve ricordé quel witz dela vecia baba che la vien zo de Castua a zercar el suo fio a Fiume, che 'l jera apunto dela Contraerea, e sicome che la baba la jera castuana alora in zitá, la jera un poco imbambinida, e la ghe domanda a uno in piazza Regina Elena se el sa indove che xe el suo fio Toni. El mato el ghe domanda indove che el suo fio el lavora, e la baba la ghe disi che el xe dela "contraria" (la voleva dir, dela "contraerea). Alora el mato el se guarda intorno con far circospeto e con un fil de voze el ghe sufia ala baba in tela orecia  ... "No la ghe stia dir a nisun, ma qua semo tuti dela contraria".

 

Bon, tornando ai pacchi UNRRA - scuseme se mi perdo sempre el filo - mi me ricordo che soto i drusi, in quel periodo de "transizion" dopo del magio 1945 - quando che tuti spetavimo come Iddio che vegni sti americani a liberarne de l' invasion slava, alora a mi e a qualchedun altro dopo de la manifestazion de San Nicolò, indove che mi sonavo, in corteo per strada, la fisarmonica, i me gaveva butado fora del Tecnico de Piazza Cambieri, e i me gaveva "epurato" perché italian nazionalista.

Mi me ricordo come che fussi ogi, che el Preside del Tecnico, professor Samani, col me gaveva "espulso", el me gaveva fato le sue scuse personali e el me gaveva deto che i lo gaveva obligado a butarme fora de scola.

Alora, sicome che bisognava per strada mostrarghe ale patulie dei drusi  la "legitimacija" (carta de identitá) indove che quela volta (e non solo quela volta), un mestier molto sospeto, alora per viver in paze mi me ero iscrito ai "Sindacati Unici" che i jera, ve ricordé, in quela vileta vizin del pasagio a livelo del Viale Camicie Nere, tra la Sabiza e Braida. I me gaveva dado un bel tesserin verde, con suso scrito: Drug - Compagno (quela volta Fiume la jera ancora bilingue) Julijo Scala, profesion "nazaposlen" che per crovato vol di "disoccupado".

Proprio ieri mi pensavo che per russo, la parola "compagno" se ciama "Tovarisc"  e da noi a Fiume se ti ghe disevi tovare a uno ti ris'ciavi de ciapar una man de bianco.

Non solo, ma con sto tesserin mi partecipavo a tute le distribuzioni de pachi UNRRA, ve ricordé, quei bei de carton maron gialeto, impermeabili, coverti de cera, con drento ben stivade tute  quele bone robe, spagnoleti, pastiglie per disinfetar l' aqua, spagheti in scatola, con una salsa che Dio me perdoni, ciocolata e "Corned Bif".

 

Alora, e qua arivo finalmente al "dunque", mi quela volta - sicome che al Tecnico gavevimo una brava (e bela) professoressa de inglese, che la abitava in una villa in quela riveta scalinada che la andava dala via Pomerio in Bonaroti - mi mastigavo giá un poco de inglese e su ste scatole de spagheti e Corned Bif jera scito in american, con tuti i particolari, come che:

1) se doveva aprir la scatoleta, tirando el covercio de sinistra verso destra con due diti: police e indice;

2) bisognava svodarla in un pignatin;

3) dopo ti dovevi cusinar tuto sete minuti e mezo.

Quela v

olta, almeno a casa mia, noi jerimo tuti, ma tuti proprio convinti che i americani i fussi un poco indrìo cole carte e deboli de comprendonio, perché su tute ste scatolete e pachetini i ghe scriveva tute ste robe come se i gaveria de far con dispossenti e poveri de inteleto che noi xe boni de far due più due.

Questo volevo dirve, xe stado il mio primo "impatto" con la ziviltá Nordamericana.

Adesso, come dapertuto, anca qua nela Germania Ovest, se sula scatoleta o sul pachetin non xe scrito come che se averze e quanti minuti se deve cusinar restemo tuti cussì fermi, come  macachi, senza saper cossa far.

Me racomando muli, ste ben atenti che sula scatola sia scrito tuto, se no coré el ris'c io de morir de fame. Bon apetito.

Luglio 1986.

 

Ditature  e  Ditatori

In una ciacolada de due anni fa mi ve contavo che in Germania Orientale, che i la ciama  Republica Democratica (?) Tedesca, tuto, ma proprio tuto xe come che' l jera da noi soto el Fassio: adunata ogni sabato in divisa, balilla che lá i se ciama "pionieri", in montura con fazoleto rosso sul colo, un giorno sì e un giorno ancora sì, sfilate col passo romano (i lo ciama passo "dell' oca") e tuta sta coreografia de museo dei orori.

Credeme, mi non me intereso gnente, ma proprio gnente de politica. Mi go bastanza de bazilar col mio lavor, le tasse, i fioi, la molje, che la me cruzia perchè de estate el mio paron, co semo in ferie, el me ciama che devo andar in qualche logo perchè xe sempre una qualche malora che la va storta. Alora gnente politica.

A mi però me piase, con in man una bireta picola, - a Fiume inveze gavevimo el otavo - ciacolar con qualchedun del più e del meno. Ciacolemo de tante robe e anca presempio dei sistemi che i adopra per governar un Paese.

E qua mi digo sempre che mi me piase de più una democrazia marza che una ditatura sana. E questo non perchè mi go una mia opinion politica. No ! Solo perchè mi me piasi assai le robe bele e de bon gusto. Presempio, me piase guardar un quadro de Rafaelo Sanzio.

Raffaello: Il trionfo di Galatea. Villa Farnesina, 1512.

Ve ricordé a Fiume via R. Sanzio ? Mi non impicaria mai zerti quadri a ojo come che la ga la mia sozera - senza criticarla, perché se volemo assai benj - indove che el pitor el ga fato un zervo con sti grandi corni che el scampa in mezo al bosco coi cani che ghe cori drio col sol color cagarela che e'l tramonta proprio in quel momento drio del monte.

A mi me piase anca la musica de Mascagni, Puccini, Rossini, Verdi, ma co sento Claudio Villa che el canta cola voze de castrá me vien - co rispeto parlando - mal de panza.

 

Mi ogi le ditature non le digerisso, sia la ditatura del Josiph Broz Tito (ex), o quela del Ceausescu in Romenia o del Gheddafi in Libia, o del Kumeini in Persia (che adesso se ciama Iran), o del Pinocget in Chile, che anca lù el scantina, e come !  O del Strosner in Paraguay, che mi me confondo sempre col Uruguay.

Non le digerisso proprio per via del "kitsch" che per tedesco vol dir: cativo gusto.

 

Voi che lezé ste robe che mi scrivo de oramai tre o quatro anni, chissá come che gaveré le scatole piene dele storie dela mia familia, molje, fioi, suozera, ezetera ezetera. Mi inveze ogni tanto imparo qualcossa de novo. Propio ieri jera qua da noi che vivemo in tela Germania Ovest, la sorela più picola dela mia molje - che la se ciama Ursula, ma che tuti ghe disi "Usci" e la vive a Viena - bon, essa la contava dela sua nona, che jera la nona dela mia molje, nona "paterna" come che se dixe, che vol dir la mama del suo papá.

Alora sta nona, quando che non la jera ancora nona, la viveva in Boemia - come tuti savé, anca la mia molje la xe profuga, solo che noi semo profughi dei slavi e essa la xe profuga dei russi - prima dela guera, in una picola zitá de sta Boemia, che la se ciamava Aussig e indove che quela volta i parlava tuti per tedesco e non per russo e per ceco (slovaco) come ogi.

Sta nona la fezeva a tempo perso la "kartenlegering", che per talian non me sovien come che se dise, ma che da noi a Fiume la se ciamava la "Butacarte".

Mi me ricordo che la mia Mama, che la jera una persona come che se deve, e che la jera anca colta e leterata, voio dir che ghe piazeva assai leger tuti sti libri dela Carolina Invernizio, "La mano della morta" del Maurizio Dekobra, "La Madonina degli sleeping car" del Pitigrilli, che el se ciamava Dino Segre, "La vergine a diciaoto carati" dela Alba de Cespedes, "Nessuno torna indietro" del Luciano Zuccoli (alias Conte Luciano von Ingenheim) che el ga scrito anca el famoso romanzo "La Freccia nel fianco", dela Liala, che quela volta la gaveva scrito el suo primo romanzo "Signorsì", dela Elisabeta Werner "Vineta" del Rosso di San Secondo (molto conossudo) e del Guido da Verona "Mimi Bluette fiore del mio Giardino".

A Proposito de sto grando romanzier Guido da Verona - anca questo jera un "pseudonimo" o "nome di penna" che saria come un nome d' arte come quei dele cantanti del "Café Sciantant" a Napoli, che le xe ciamava Madmuasel Nini La Bouche, Juliette de Plafon e Denise la Grand, e che le jera tute nate Carmela Esposito, Concettina Cacace e Teresina Palumbo. Quela volta i contava una barzeleta (un witz) dove che apunto un giorno sto Guido, grando Scritor, el jera coi amizi in auto (una Torpedo) e che i se gaveva fermado vizin de Venezia per saludar uno. E el famoso romanzier - che el fazeva personalmente de sciafer sula sua auto, coi ociai ala motociclista, el spolverin e i guanti bianchi - el se gaveva presentado a sto mato, come che se usa, el ghe gaveva dado la man, disendoghe: "Guido da Verona" e el mato el ghe gaveva risposto: "Ostregheta, alora me imagino che el sará stracco".

Sempre restando nel tema leteratura, ve ricordé quel altro witz de un ricevimento (ogi se disi "party) in casa de "nuovi ricchi" indove che apunto un voleva far veder de esser leterato, e el ghe domanda ala parona de casa - sgnonfa, coi brazi carighi de bracialeti de oro: "signora, le piace Rosso di San Secondo" ? "Oh Dio, come no, ghe risponde la baba - ma sa, a casa nostra l' ingegnere mio marito beve piutosto el Bianco del Frascati".

Alba de Cespedes	Carolina Invernizio
Rosso di San Secondo	Guido da Verona

Alora, tornando ale butacarte - Me dové proprio scusar che mi me perdo sempre el filo - ve disevo che la mia mama bonanima, che la jera una persona molto seria e senza stupidezi per la testa, bon anca essa, quando che jera malani o problemi in familia, la andava ogni tanto da una de ste butacarte per farse dir come che se meteva le robe e se tuto sarìa andado ben o mal.

Non xe che quela volta le fazessi ste robe "professionalmente", non come ogi che sul "Coriere dela Sera" de Milano, ogni santissimo giorno xe una mesa pagina indove che in tei "Anunci Economici" (che adeso se ciama "Picola Publicitá) i fa reclam per "Sibilla" "Cartomante" "Chiaroveggente" "Astro occultista" "Astro carrtomante" che me par proprio che ogi, co sti ciari de luna, xe un mestier che devi render asai ben. No, quela volta jera babe che cussì - come la nona dela mia molje - le fazeva ste robe a tempo perso e le se guadagnava qualche flica.

 Me racomando muli, ste atenti che la Butacarte non la ve tiri un bidon e magari la ve domandi zinquantamila lire per dirve che vinzeré un terno al loto ! Cole zinquanta carte andé piutosto a far una bela marenda e bevuda sempre secondo el moto: "Soldi sará e noi non saremol".

Importanza  dele  galosce

Corsi  e  ricorsi

 Se me ricordo ben, era propio el grando filosofo italian Giambattista Vico che el gaveva scrito quela teoria dei "Corsi e ricorsi storici", che sarìa come dir che nela storia dei omini tuto se ripeti de novo. Mi digo sempre che, se quel disgraziado de Adolfo Hitler, inveze de andar sempre in giro col brazo a mezasta, el gaveria leto i libri de storia, indove che xe tuto scrito, quando che el Napoleon Bonaparte el gaveva mandado tuti quei soldai in Russia e sul più bel el ga dovudo molar in bando tuto e tajar la corda de brivada per el fredo che era, alora mi credo propio che anche el Adolfo no' gaveria mandado in Russia tuti quei soldai, anca lori disgraziai, che dopo nissun ga mai capido cossa i era andadi a zercar - e che erimo andadi a zercar anca noi coi nostri poveri Alpini dela Julia, morti de fredo in sto paese imenso indove che de inverno i mati dele "isbe" - gavé leto "Guera e Pace" o la "Anna Karenina" che i gaveva fato quela bela pelicola con Greta Garbo ? - I se fa el leto sula stua .

 

Tornando ai Corsi e Ricorsi, xe tuto come le cotole dele babe che le se scurta e le se slonga cola moda, e come le cravate dei omini che una volta le xe larghe come tovaje, e dopo tutintun vien la moda dele cravate strete. E alora uno el xe ridicolo se 'l va in giro cola cravata larga e te toca andar in botega a comprar cravate nove.

Dopo qualche anno,  de novo gnente più cravate strete, torna la moda dele cravate larghe e te toca tirar fora ancora i bori.

Alora mi, cossa go fato ?

Dopo che xe passada la moda dele cravate larghe un venti zentimetri (adeso semo sula moda de "mezaria") e quela dele cravate tipo "cordela" (tre zentimetri del largheza) mi go salvado in un scartozo in un scafeto del sinfonier in camara de leto, tute ste cravate e quando che torna una dele due mode (cordela e tovaja) mi go alora ste cravate ala moda bele e pronte, senza esborsi de contante.

 

 

Un' altra roba me vien in mente:

Quando che mi ero mulo a Fiume e gavevo 15 - 16 ani, che era i ultimi ani dela guera e el primo anno dela invasion (mi la ciamo cussì), mi me ricordo che come tuti i muli dela mia etá me impastavo i cavei de brilantina, che i diventava duri come legno compensato. E sicome che i schei per la brilantina solida "Linetti" (muli che profumo, che olezzo) spesso e volentieri non li gavevo, e la mia musina la era svoda, alora adopravo uno dei sistemi quela volta in uso.

Qualchedun el adoprava aqua e zucaro, ma questo - dise i esperti - era un sistema dei anni venti. Mi, quando che ero cisto, adopravo aqua e savon, de quel bianco tipo "Marsiglia" che quando che' l se sugava lassava i cavei bei lissi stiradi e tacadi come quei de Rodolfo Valentino che Dio ghe brazi l' anima. Mi gavevo purtropo sempre i rizi de natura, mentre sti grandi atori era sempre con ste testine de cavei bei tiradi, che i pareva de lustrofin.

Nei ani zinquanta, sessanta e settanta sta mania dela brilantina la xe sparida. Era de moda i "zazanich", caveloni con le cavelade longhe e incolte tipo "erba mata" che a mi in tram i me fazeva sempre impresion perché gavevo paura che qualche bestiolina (termine scientifico: pidochium vulgaris) la fazesi un salto in lungo verso de mi.

I "Punk" coi cavei rossi, o verdi, o lila, taiadi cola machineta tipo "el ultimo dei Mohicani" i sta pian pian sparendo anca lori e torna, almeno qua da noi in Germania Ovest, le petinature ala Elvis Preslei.

Bon volevo contarve che el mio fio Marco, che ogi el ga diciasete ani, el xe tuto el giorno davanti del specio che' l se mete nei cavei anca lui un smir de tubeti trasparenti rosa o blu che xe come la nostra brilantina solida dei ani 1944 - 1945, solo che i la ciama adeso "gel", ma xe sempre una roba che i muli i ga de novo le teste coi cavei lissi e lustri come el Vitorio De Sica bonanima.

Come ve disevo: Corsi e ricorsi storici. Ve lasso per ogi e me racomando muli: lisseve ben quei quatro pei che ve xe restadi intorno dela zirica, perché la brilantina la fa de novo furori.

1987.

 

La  bora  nel  sub  -  conscio

 

Come el Niflo nela sua ciacolada dal Nord, anca mi me inacorzo che son arivado ala Zinquantesina Ciacolada dalla MittelEuropa e qua ve devo dir propio grazie per la santa pazienza che gavé avudo con mi e anca grazie per tute le bele leterine che me gavé scrito in tuti sti ani  da Italia, Australia, Canada, Stati Uniti de America e tuti sti posti indove che ogi vive fiumani. Mi zerco sempre solo de tegnir viva e impizada quela fiama, fiameta che la se ciama Fiume, la nostra Fiume, quela dela nostra infanzia, dela nostra giovineza, che storicamente la era anca "Giovinezza", quela che fazeva rima cola primavera de beleza.

 

Quei grandi psichiatri, dotori, e profesori che i scrive quele robe difizili sule memorie e impresioni pre-natali infantili ezetera, come presenpio el Sigismondo Freud che el ga scrito quei due libroni sula "Interpretazione dei Sogni", libri che i vendeva sopratuto a Napoli . Lá la gente no ga gnente de magnar e alora i vive solo per el Maradona, e per el giogo del loto, che la xe tuta una scienza che la te spiega che numero che ti devi giogar sula roda de Cagliari quando che ti se insogni che el gato te ga ribaltado el pignatin del late in cusina.

Disevo che sti grandi scienziati i dise che i ricordi - impresioni del sub-conscio (Freud) dela prima infanzia li gavemo tuti.

Ve fazo un esempio: noi fiumani nati e cressudi a Fiume, semo nati e cressudi con la Bora. Da noi no la era tanto tremenda come che la xe a Trieste indove che ancora ogi i mete le corde sui cantoni in batuda de bora, tra Piazza Unitá e Via del Mercato Vecchio, perché la gente non la se ribalti, ma la sufiava ben anca a Fiume, abastanza alegra.

 

Giorni di bora a Trieste

Qua da noi a Francoforte in Germania Ovest la gente non la conossi cossa xe vento.

Qua xe un poco de vento solo per poco tempo, quando che vien neverin o burasca, ma normalmente no. La mia molje, che la xe nata nela pianura boema e cressuda fra le montagne dela Baviera, a essa el vento el ghe da fastidio e quando che venivimo a Trieste non la podeva sofrir la bora.

Per mi la bora la apartien ai mii ricordi più bei de Fiume.

E non solo ricordi de quando che son svejo, ma anche de quando che dormo. E qua semo nel sub - conscio.

E adesso, come sempre - prima de perder el filo - vegno al dunque.

Noi abitemo qua vizin de Francoforte, a Offenbach, che 'l xe assai bel, tranquilo e un poco fora de man, e la unica roba xe che sopra de noi pasa i aroplani che i atera sul aeroporto de Francoforte, ch' el xe el più grando de Europa.

Veramente i franzesi i dise che el più grando aeroporto de Europa xe el suo, de lori a Parigi, che  'l se  ciama Ciarl Degoll, ma savemo come i franzesi che i esagera sempre, perché i ga la "mania de grandeza" e i dixe senpre che lori i xe i più furbi e i più bravi de tuti.

 

Aeroporti di Francoforte e Parigi

 

Bon, volevo dirve che in quartier indove che abitemo se sente svolar sti areoplani, ma oramai, dopo tanti anni - o perché gavemo fato l' abitudine, o perché sti novi "Jet" no i fa più tanta confusion, non ghe bademo più.

Solo ogni tanto, sempre de note, verso le due o le tre de matina, passa un de quei grandi "Hercules" militar americani con quatro eliche, che i me dise che xe i aroplani militari americani più grandi del mondo, che i porta dala America, diretamente qua in Germania cariarmati, razi cola atomica, e alora sì che se sente assai remitur.

Ieri note mi dormivo come un ghiro e el rolò dela nostra camara  de leto - perchè mi dormo sempre col rolò sbassado per non svejarme tropo presto de matina - perché passava apunto un de sti tochi de aroplani, el se mete a vibrar, e tremar pian pian.

Mi in sonno, sentido nel mio sub conscio sto rolò che se sbassava, me pareva proprio de esser nel mio leto in quartier, sul canton dela via Giotto cola via Bonaroti in Belveder a Fiume, quando che de note tutintun scomiziava a sufiar la bora e tuti i rolò i vibrava proprio cussì.

Era un sogno assai bel, cussì vivo e vero che quando che me son svejado me xe rimasta sta bela impression, sta bela sensazion de quando ero picolo e che de note i rolò i tremava soto i refoli dela bora sul canton tra via Giotto e Bonaroti.

 

Sognare vento

Adio muli. Me racomando, tegnive duro quando che sufia e ocio ai giri de aria.

 

 

Caligheri  e  classi  sociali

Nei ultimi zento anni, bisogna propio dir che le diferenze de classe sociale le xe assai cambiade. Senza andar tropo lontan, ancora soto la Defonta Austira-Ungaria. la molje del soto ufizial (Unterufizir) dela pulizei de cariera la podeva andar in giro per strada col capel - e la veleta magari come la mia Mama bonanima, che la portava sempre la veleta. E inveze se el marì el era gendarme semplice no la era autorizada a portar el capel in publico. A casa sì, nissun ghe diseva gnente e al massimo la se meteva in testa un fazoleto come le mlecarize e le donne de servizio.

El popolo el era ignorante e sporco e i ricchi i era ben vestidi e cole mani nete: la dama e el gentilomo i gaveva sempre, anca de estate, i guanti.

Dio mio, no xe propio che tuto sia tanto cambiado nel mondo. Anca ogi i soldi comanda e la miseria la ubidissi. Ogni tanto - quando che quei de soto no i ga voja de star cuci - alora xe ribalton e gavemo visto in Francia la Rivoluzion francese, in Russia la Rivoluzion de Otobre, che i la ga fato in novembre, e in Libano, quando che i arabi poveri che i era sotoproletariato, i se ga stufado de netarghe le scarpe ai ricchi cristiani - maroniti.

 

Mirabeau, Danton, Desmoulins, Robespierre, Marat, Saint-Just

 

E ancora adesso lá i se sbara e i se copa ogni santissimo giorno. In ogni modo mi trovo assai bel che, come che giá ve disevo, ogi i muli a scola - mi vedo mio fio, qua in Germania Ovest in liceo - i va tuti vestidi in Terlis, coi blu gins e la majeta americana, tuti compagni se el pare ghe xe tranvier o diretor de banca.

I inglesi, che i xe un popolo intelligente, anche se el Mussolini el diseva che i xe tuti dispossenti, giá de sempre i ghe mete ai muleti la montura col stema dela scola, cussì che apunto non se vedi la diferenza tra un fio de un mortodefame e el fio del Lord. Oddio anca da noi, a Fiume, se ve ricordé - mi go ancora le fotografie - andavimo in asilo (mi andavo in piaza Cambieri) col traverson nero.

Anca qua però era la diferenza: la magioranza dei muli i gaveva el traverson de stofa normal opaca. La mia Mama inveze, che la ghe tegniva assai a far bela figura, la me fazeva cusir, dala Nela Udovini in Ospidal, su misura un traverson de saten nero, bel lustro.

E qua arivo indove che volevo.

Come dapertuto, quela volta  anca da noi a Fiume era diferenza fra rion e rion, tra strada e strada, tra case e case. Come che ve disevo, la mia Mama la ghe teniva de eser del "ceto medio" - essa la contava sempre che una sua vecia zia in Austria la era contessa, ma mi non ghe go mai credudo - e alora a mi me tocava andar in giro, povera cratura, vestido sempre come un figurin.

Go trovado una fotografia un poco sbiadida indove che mi ero un pisdrul de tre o quatro ani, in molo San Marco de inverno, con un capotin de pelicia, i guantoni de pele e le scarpete de laca nera, che sicome che gavevo dificoltá cola parola, mi me ricordo che disevo "scarpe de lata". De estate ero sempre vestido de marinareto, tuto in bianco con dedrio el coleto blu de marinaio cole striche e le stelete e davanti cole cordele.

Mi me ricordo ancora, come se fussi ogi, che ogni tanto - per fortuna non tanto spesso - me arivava una papina quando che da Fontanela me jozava, dal scartozeto, el gelato de ciocolata sule braghe bianche.

Come che ve contavo in una ciacolada quatro ani fa, la Mama la me diseva che noi - che abitavimo sul lato "Sud" dela via Bonaroti e che apartenivimo ala Parochia dei Capuzini in Sabiza - erimo assai meio dei brosquari, che i era, non proprio cussì zazanich e ordinari come quei de gomila, ma poco ghe mancava. La Brosquaria infati la scominziava dal lato "Nord" de Bonaroti, che el era giá soto la Parochia de Cosala.

 

 

Come a New York ai mii tempi - non so ogi, ma qua me saverá sicuro dir qualcossa la mia afezionada letrice, la cara siora Padovani, che la me ga scrito che dala sua finestra se vede la Impair Stett Bulding - presempio la 5^ Strada era un indirizo "bon". El Bronx e Broccolino i era indirizi un poco scalcinadi.

 

Quinta strada, Breooklin e Bronx  a New York

Da noi a Fiume indirizi "boni" era la Via Donatelo, indove che gaveva le vile i richi, o la Bonaroti fino al numero trentauno: Dal 33 al 37 era le case popolari. Anca Scojeto e la via de l' Aquedoto non i era propio "quartieri alti". Imagineve quante proteste me arivará dai mii letori conzitadini apena che i lege ste robe che mi scrivo.

Volé inveze farse due ridade inveze de rabiarse ? Se ve ricordé, in una ciacolada del anno scorso mi scrivero: "una volta el caligher da noi el era anca qualche volta portinaio e el gaveva la botega in un gabioto in tela androna del porton de casa. E qua gaverio propio bisogno che qualchedun de voi me dia una man con una nota storico - biografica su qualche caligher de Fiume. Me fazé sto favor, grazie.

E fin qua la mia ciacolada. Bon, ve trascrivo una leterina che la me xe arivada de un dei mii letori.

"Caro Signor Scala, io ho un caro amico che studiando e lavorando sodo ha giustamente raggiunto una bella posizione. E' primario medico e suo nonno era un "caligher" fiumano. Io naturalmente sono a conoscenza di ogni cosa, ma mi asterrò bene dal raccontarlo a lei, perché vada a sbandierarlo (magari con nome e indirizzo) a migliaia di lettori, con grave disagio del mio amico che merita rispetto e riguardo. Mi permetto di osservare che la sua richiesta è inopportuna, secondo me".

Come che vedé, xe ancora qualchedun che'l se vergogna perché el suo nono el era caligher.

 

El caligher de piazeta San Micel

che tuto 'l giorno strussia lá in botega

l' estate, verso sera, co fa bel

el porta fora in piaza la carega

...

 

 

Mi volerio qua gentilmente risponderghe al caro concitadino che el me ga scrito - inanzituto grazie per esser convinto che go "migliaia de letori" e dirghe che mi go sempre avudo amirazion e rispeto per i nostri valenti artigiani a Fiume, e  mi che go anche "studiado" e che go una bona posizion - me considerario onorato se el mio nono el fussi stado caligher o bandaio. E anca i mii amici,  conoscenti e el mio paron i continuaria, credeme, a dirme bongiorno e a darme la man se i saveria che el mio nono era caligher a Fiume, indove che sta profession la era onorata e rispetabile.

Tornando ale diferenze de classe social, se pensé che quando che andaremo tuti a sburtar radicio dal Lukovic - un proverbio arabo - a mi me piasi assai i proverbi arabi e cinesi - el dise: "la ultima camisa no la ga scarsele" che vol dir che non se pol cior drio gnente.

Saremo tuti, o lá suso coi angioleti, o lá zo col Malefico, e nissun te domandará se ti eri rico o pitoco o che mestier che fazeva tuo nono o in che via ti abitavi. Importante - per la sistemazion in piano elevato o in soteraneo - sará se nela tua vita terena ti ga fato qualcossa per aiutar el tuo prossimo o se ti ga sempre ciapado tuti a piade nel dedrio.

 

Giudizio universale

Adio muli, steme ben e me racomando le bone azioni, se no ve guantará el diavolo.

 

Gita  in  barca  de  note

Voi non me crederé quante cose intressante che xe qua in sta Italia del Nord-Est che mi pian pian discoverzo dal anno scorso, de quando che - dopo tanti anni de Esilio - me son calumado qua fra sta Zente Veneta. Indove che mi go el mio Penthouse - che per noi fiumani - americani sarìa come un quartierin sul teto con una granda teraza che la guarda sula spiagia - a Bibione Pineda, bon lá, tacado, xe Porto Baseleghe, che xe indove che i mati i ga le sue batane, passere, barche a vela de ogni grandezza e de ogni prezzo, e de sto porto se va in laguna, che la xe un poco come i Everglades in Florida, con sta aqua verdolina, con tute ste canne e canai, solo che qua non xe cocodrili, ma xe carigo de bisati. E quel che xe assai bel, xe che in te sti canai e canaleti, xe anca magari, con davanti un pontisel o moleto con due tole de legno marzo per tacar la barca, betole e ostarie indove che se magna e se beve.

 

Hemingway, che el saveva viver - fino a quando el se ga stufado, e alora el se ga sbarado un tiro in testaco co 'l s'ciopo - lui el se remenava spesso e volentieri de ste parti.

Basta che lezé el suo romanzo "Across the River and into the Trees" (Al di lá del fiume e tra gli Alberi) indove che el scrive de quando che el bazilava qua, propio vizin de dove che abito mi adesso, in laguna a sbararghe ale povere anitre.

 

 Hotel di notte sul fiume, a Concordia Sagittaria

E indove che el fiume Lemene - mi abito a Concordia Sagittaria, che la xe su sto fiume - el finisse in laguna, lá xe la Ostaria del Nico che le xe una assai vecia casa de pierecote e suso se leze ancora "Dopolavoro" e proprio da sto Nico - sará stado magari su' pare - el andava spesso el Ernesto Hemingway. Xe ancora le fotografie, un poco sbiadide, impicade sul muro.

 

	El Nico el fa i più boni bisati alla griglia rostidi sul carbon dolze de tuta la laguna, sepoline frite e radicio sui fasoi. El vin el xe bon, anca de sua produzion. A Bibione mi conosso una saja de lori e un mio amico xe el Hans, che lui el xe tedesco de Monaco de Baviera, el xe fabricante e el ga un fotìo de schei.
Sto ano el ga vendudo la barca vecia e el se ga comprado un bel oto metri diesel novo, con salotin a pupa, camara de leto, bagno e cusina. Per provar sta barca i era andadi anca fino a Ragusa, che adesso la se ciama Dubronik.

Me scusaré sto sfogo pseudo-lirico, ma se non se sfoghemo fra de noi, a chi ghe podemo se no contar ste malinconie, sta apartenenza de anima e corpo a una zitá che o la ga zercado, senza riussirghe, de scanzelarla dala carta geografica e dala memoria dei omini.

Adio muli, me racomando, non steve dismenticar dela nostra Fiume, e zerchemo de tgnir, fin che podemo, impizada la fiama, sta fiameta come quela eterna davanti el Tabernacolo del Altar, o davanti del Milite Ignoto, copado in guera.

El  club  dei  Demoghela

In magio 1945 mi ero, con altri muli dela milizia portuaria della R.S.I., ma in pratica gavevimo i ufiziai tedeschi, perché Fiume era "Adriatriches Kuestenland" cioè "Protetorato" del Terzo Reich. Noi erimo seradi in quel grando Bunker tacado a la Capitaneria del Porto a Fiume.

Tutintun ariva la notizia che i Drusi, i partigiani, ossia  l' esercito più o meno regolare jugoslavo di Tito, i era giá entradi a Fiume. I tedeschi gaveva, giá el giorno prima, fato saltar per aria el porto.

Bon, alora a sentir sta notizia tuti i tedeschi che i era in sto bunker i ga ingrumado patrone, scatolete, viveri e munizioni e i ga tajado la corda per andarse a consegnar a Trieste ai Mericani, perché lori no i voleva cascar nele mani dei titini.

Erimo rimasti, in sto grando bunker, sei o sete noi muli, tuti fiumani, dela Portuaria.

 

Come anca i altri, mi son andado fora, go butado el s' ciopo, o forsi era el mitra bereta calibro 9 in aqua, e son scampado a casa indove che go subito brusado la montura e el documento che noi gavevimo come teserin blù dela polizia tedesca (figureve !).

Bon, non apena  la "Voce di Fiume" ga publicado ste quatro monade auto biografiche che mi gavevo scrito, el scrive una "letera aperta" el mulo Dott. Amleto Ballarini, ogi Presidente dela Societá di Studi Fiumani a Roma, e una persona molto importante.

El 15 giugno 2002 erimo a Fiume ala Messa a San Vito e se gavemo visto per la prima volta, e lui, el me ga abrazado "Caro Scala" (!?) e baxado (!?). E alora sto Amleto - che' l xe più giovane de noi e no' l ga mai visto una guera - el scrive che sto Giulio Scala el xe un disertor e un "anti eroe" perché "il fucile non si butta mai in mar ... e lui doveva restare a pié fermo con il fucile imbracciato ad aspettare il Nemico.... "

Comitato Stampa de "LaVoce di Fiume"  e S. Messa per i Patroni SS. Vito e Modesto

Mi me ricordo che ghe gavevo risposto, sempre sui giornai, che la "qualifica" di anti eroe  la me piase assai e che mi me identifico con essa. Mi, in vita mia, non son mai stado un Eroe.

Efetivamente mi a Fiume, nel magio 1945, quando che gavevo sedici (16) anni e la guera era giá finida, son scampado.

"I Eroi" - gavevo scrito con tuto rispeto - "i more tuti giovani".

Sará perché mi ogi go una alergia cronica per guere, militari, uniformi, medaje, decorazioni e armi de ogni tipo. Mi rispeto e piangio tuti i omini - quasi tuti giovani - morti mazadi in guera e, come voi savé, mi go eliminado dal mio vocabolario la parola "Caduto" perché caduto xe un che' l se intopa e el casca. Tuti i altri i ze morti e mazadi. "Caduto" xe una poetica espression inventada dai Regnanti, Governanti e Politici, apunto per atutir el dolor dele povere Mame, dele spose, dele sorele.

Anca el Gesù de Nazareth, che el era senza dubio un grando idealista e Eroe, e che mi go una grande venerazion e amirazion per Lui - anca se non me interessa saver se el suo papá, de Lui, el era o el xe extra-terestre. I Romani i lo gaveva copado a Gerusalemme quando che el gaveva apena trenta tre anni. E mi inveze son qua, go pasado i setanta anni, col bicer de vin in man, e vivo.

Cari amici, mi ve vojo ben, steme ben e se qualchedun el vol ancora notarse nel Club dei Demoghela & Disertori el xe el benvenudo.

 

 Moreri  e  fighi  neri  cola  joza

Lezevo recentemente sul "Corriere della Sera" una leterina che un mato el ghe scriveva al Indro Montanelli (rubrica "La Stanza") indove che el diseva che el Montanelli el gaveva scrito in un suo libro che Ludovico Sforza i lo ciamava Ludovico il Moro perché el gaveva la pelle scura e i cavei e i oci maron. Sto letor el dixe che lui no' l xe d' acordo.

Secondo lui el Ludovico i lo ciamava cussì perché quela volta lui gaveva favorido la coltivazion dele piante, e in particolar de quele del gelso, che i lombardi i lo ciama "muròn", i francesi "mourier", i latini "morum".

Ludovico par che el gabi fato piantar un fotìo de sti alberi e i contadini i ghe gaveva dado sto sopranome. Sará vero ?

A mi me se subito vegnudo in amente i nostri moreri, perché da noi a Fiume, se ve ricordé, i alberi da gelso apunto li ciamavimo "Moreri" e i fruti non era le more, ma le murve, bianche e rosse.

Ricordi, ricordi, me par de esser el Baudelaire che el scriveva: "J' ai plus de souvenirs que si j' avais mille ans".

Mi me ricordo due de sti loghi dove che era sti alberi.

Una, era la assai conossuda "Ostaria ai Due Moreri", che la era in Braida, indove che scominziava la Via Val' scurigna a destra, che se andava suso per le scalete. De estate, quando de sera la aria la era tiepida - se ricordé quele bele sere de estate a Fiume, con i nostri amici Fumi, che lui el gaveva una botega de piturazioni de case in Via Carducci, propio visavì de la Provincia. La mia Mama (e mi sempre tacado) essa la andava apunto a sentarse al fresco in sta Ostaria ai Due Moreri, indove che era anche assai bei giogi de boce, lissi come biliardi, e vizin de ognidun de sti gioghi era, inciodado sul tresso de legno che sosteneva la veranda, un scafeto indove che se pozava el dopio o el spriz de nero.

A mi che ero picio i me comprava una pasareta.

Me par come che fussi ogi, sta bela ostaria, con ste lampade col piato tondo impicato soto la pergola, sto bel verde dei alberi e mi me indormenzavo distirado sul bancheto, cola testa sui ginoci dela Mama, col rumor dele boce che le se rodolava su sta bela pista de sabia fina fina e sopressada col rullo de piera, che le s' ciocava, col rumor de legno contro legno, contro el balin.

 

Tornando ai moreri, come che voi savé, mi abitavo in Bonaroti sul canton dela via Giotto, per andar in Casa Balilla e oltre dela Bonaroti, visavì, era una riveta che la andava suso in Via Belveder.

Sula destra dela riveta, apunto sula Via Belveder, era una casa a tre piani, apunto dove abitava i nostri amici Matcovich, che el marito dela Signora anca lui el era Capitano Maritimo, e in sta casa el se gaveva trasferido col suo negozio magnativo el Panbianco, che prima el gaveva la botega un poco più il lá, sempre in via Belveder, squasi sul canton cola Via Vasari, che la andava suso in Zimiterio, verso la Via Donatello, sula sinistra.

E dopo vegniva la Casa Copetti indove che abitava el Dotor Blasich, zanelian autonomista, che quela note che i Drusi i xe vegnudi a ciòrme a mi a casa, i era prima andadi a casa sua ei lo gaveva copado e sofigado in leto, che lui era mezo paralizado e no' l podeva caminar.

Alora, al di lá de sta riveta era apunto due grandi moreri.

Quando che le more le era mature e sti due moreri i gaveva le murve bele bianche, grandi e sugose, e alora el paron el distirava de soto un lanziol e el scassava sti moreri finché cascava zò le murve, e noi mularia podevimo ingrumarle e magnarle sul posto senza, se capissi, portarle a casa.

Ma mi me vien inamente un' altra storia, de un albero de fighi. Ero picio e erimo in spiagia in Valsantamarina, che adeso se ciama Mos' cenic' ka Draga e mi bagolavo per la campagneta, che era la stagion de sti alberi de fighi - da le nostre parti era tanti alberi de fighi - i era bei maturi.

Mi me ricordo che era fighi, de quei neri, cola joza.

Alora, lá era una baba e mi ghe go domandado, con educazion -  e mi de picio ero assai educado, la mia Mama, essa la me gaveva imparado la educazion cole papine, antico e valido sistema educativo - alora mi ghe domando a sta baba se la me regala un per de fighi, e essa la me disi: "Picio mio, ti pol andar suso sul albero e magnar fin che ti vol, ma non portar via".

Alora mi son montado su sto albero e go scominziado a sbafar sti bei fighi sugosi, dolzi come el miel. Sta baba - mi penso ogi - come se disi per talian "irresponsabile" a lassar un muleto che se incoconi de sti fighi scaldadi dal sol. Insomma, mi me son impinido la panza fino a che me pareva de s' ciopar.

Ghe go deto grazie ala signora - vedé che ero ben educado - e son andado a casa. Dopo una ora - non te digo e non te conto - me ciapa granfi teribili, sudor fredo, tuta la testa che me gira e un mal de panza che me pareva de morir.

Mi stavo cussì, ma cussì mal, che la mia Mama, essa la me ga dovudo portarme de balin dal dotor, che non me ricordo cossa che el me gaveva fato, un clistere o altro, ma - ancora ogi, dopo sessanta e più anni - mi stago atento a non magnar tropi fighi, che i me piase sempre, tuti in una volta.

 

 

 

Me racomando muli, ste atenti al mal de panza e tegnive legeri.

 

 

I  Allievi  esterni  del  Tommaseo

 

Gruppo degli esterni. Giulio è il secondo da destra, accanto alla bandiera.

 

Se ciacola, se scrive sempre sula vita interna del Colegio. Ma se volemo esser propio sinzeri e con una man sul cor (no sula panza), i veri intermediari, i autentici Public Relations dela nostra Comunitá ospitada nel Colegio Niccolò Tommaseo di Brindisi con la Societá brindisina - non con la Onorata Societá, che la xe un'altra roba - più verso Napoli, erimo, senza ombra de dubio, noi Esterni.

Quei interni, che i gaveva le scole drento el Colegfio i era "puri" Convittori in un Mondo ristreto a aule, camerate, refettorio (legi ceci) ezetera. Insomma, era un universo "Self-Substaining".

Noi Esterni erimo un estratto conzentrado e sublimado del Essere fiuman, dalmata istrian brilante, inteletual elegante, fassinoso, che el se presentava in tuta la sua magnifica esterioritá, atraente e piena de juvenile estemporaneitá, al mondo ancora sognante - e disemo forsi indormenzado de la gioventù masculorum utque faeminarum dela metropoli dela Puglia.