|
ATTENZIONE: I file contenuti in questa sezione sono soggetti ad essere eliminati
ADDIO FIUME
Go ricevudo ieri
diverse e-mail dai amici de ML Histria e del
Forum Fiume con argomento: “Tornar”. Vojo ogi
risponder. Prima de tuto devo ringraziar tuti i
mii afezionadi Lettori che i me gà seguido in
questi ultimi anni in ste romantiche divagazioni
come se fussimo in piena decadenza dannunziana.
I inglesi che i gaveva trascorso una vita
intiera in tele Colonie come Singapor e Hong
Kong, quando che i se riferiva ala Inglitera i
diseva sempre “Home”.
Per diversi motivi
o forsi perchè mi son apena reduce da una longa
malatìa, che la me gà lassado el segno nel mio
corpo e nel mio spirito, opur forsi perchè go
vissudo in tanti Paesi del Mondo, mi non me
sento sinceramente de considerar
la
città che me gà dado la vita nel lontan 1928
come “Home”. Per mi “Home” xe indove che vivo
con la mia molje, i mii libri, le mie
robe. Noi non podemo delegar la eredità dei
sentimenti e el afetto ai nostri dissendenti,
molti de lori nati in Paesi de lingua e culture
diverse.
Anca le generazioni
nate nele nostre terre le gà una altra lingua e
una altra cultura. Tuto el nostro “passado” el
xe una
serie de imagini incolade nel nostro albun dei
ricordi che ognitanto aprimo e guardemo con
tenereza.
Mi son
Fiuman nato a Fiume.
Te amo
Fiume, te go amada per tuta la mia vita. Te
lasso ogi per sempre come che se lassa un grando
amor, con comozion e afetto che no’l finirà mai.
Addio
Fiume.
Maggio 2005
|